గాడ్‌ ఫాదర్‌ పై 'ఆచార్య' ఎఫెక్ట్‌ ఏం లేదట!

మెగాస్టార్‌ చిరంజీవి వరుస సినిమాలతో ప్రేక్షకుల ముందుకు వచ్చేందుకు సిద్దం అయ్యారు. అందులో భాగంగా ఇటీవలే ఆచార్య సినిమా ను విడుదల చేయడం జరిగింది. కొరటాల శివ దర్శకత్వంలో రూపొందిన ఆచార్య సినిమా లో రామ్‌ చరణ్ కూడా నటించడం తో అంచనాలు భారీగా పెరిగాయి. కాని ఆచార్య సినిమా ఆశించిన స్థాయిలో అంచనాలను అందుకోవడంలో విఫలం అయ్యింది.

వసూళ్ల విషయంలో ఆచార్య సినిమా తీవ్రంగా బయ్యర్లను నిరాశ పర్చిందనే వార్తలు వస్తున్నాయి. ఈ నేపథ్యంలో చిరంజీవి తదుపరి సినిమా విడుదలకు బిజినెస్ ఇబ్బంది అయ్యే అవకాశం ఉందని.. ఆచార్య స్థాయిలో బిజినెస్ అవ్వాలి అంటే కొన్నాళ్ల పాటు వెయిట్‌ చేస్తే బెటర్‌ అనే ఉద్దేశ్యంతో చిరంజీవి తదుపరి సినిమాల మేకర్స్ ప్లాన్‌ చేస్తున్నట్లుగా వార్తలు వచ్చాయి.

చిరంజీవి తదుపరి సినిమా గాడ్‌ ఫాదర్‌ ప్రేక్షకుల ముందుకు రావాల్సి ఉంది. లూసీఫర్‌ రీమేక్ గా రూపొందిన గాడ్‌ ఫాదర్ సినిమా షూటింగ్‌ ముగింపు దశకు చేరుకుంది. త్వరలోనే సినిమా నిర్మాణ కార్యక్రమాలు పూర్తి చేసుకుంటుంది. ఈ సమయంలో ఆచార్య సినిమా ప్లాప్‌ అవ్వడంతో గాడ్ ఫాదర్‌ సినిమా విడుదల వచ్చే ఏడాదికి వాయిదా పడే అవకాశాలు ఉన్నాయనే ఉద్దేశ్యంతో ఇప్పటి వరకు మెగా ఫ్యాన్స్ ఉన్నారు.

తాజాగా మెగా కాంపౌండ్‌ నుండి అందుతున్న సమాచారం ప్రకారం చిరంజీవి గాడ్‌ ఫాదర్ సినిమాను ఆగస్టు లోనే విడుదల చేయాలనే ఉద్దేశ్యంతో ఉన్నట్లుగా తెలుస్తోంది. ఆగస్టు లో చాలా సినిమాలు విడుదల కాబోతున్నాయి. అయినా కూడా చిరంజీవి గాడ్ ఫాదర్‌ ను అదే నెలలో విడుదల చేయాలని భావిస్తున్నారట. అందుకోసం చిత్ర నిర్మాతలు ఏర్పాట్లు చేస్తున్నారు.

ఈనెల చివరి వరకు లేదా వచ్చే నెలలో గాడ్‌ ఫాదర్‌ సినిమా విడుదల తేదీ విషయంలో స్పష్టత ఇస్తూ విడుదల తేదీని కూడా అధికారికంగా ప్రకటించే అవకాశాలు ఉన్నాయి. మలయాళ లూసీఫర్‌ కు పూర్తి మార్పులు చేర్పులు చేసి దర్శకుడు మోహన్ రాజా ఈ సినిమాను రూపొందించాడు. సినిమా లో నయనతార కీలక పాత్రలో నటించగా సల్మాన్ ఖాన్‌ మరియు పూరి జగన్నాధ్ లు గెస్ట్‌ రోల్స్ లో కనిపించబోతున్నారు.