సర్ప్రైజింగ్ పోస్టర్ తో 'ఆచార్య' షూటింగ్ అప్డేట్ ఇచ్చిన మేకర్స్..!

మెగాస్టార్ చిరంజీవి -మెగా పవర్ స్టార్ రామ్ చరణ్ స్క్రీన్ షేర్ చేసుకుంటున్న తాజా చిత్రం ''ఆచార్య''. కొరటాల శివ దర్శకత్వంలో ఈ సినిమా తెరకెక్కుతోంది. తండ్రీకొడుకులు చిరు - చరణ్ కలిసి నటిస్తున్న ఈ మూవీ కోసం మెగా అభిమానులు ఆసక్తిగా ఎదురుచూస్తున్నారు. సమ్మర్ లోనే రిలీజ్ కావాల్సిన ఈ చిత్రం కోవిడ్ సెకండ్ వేవ్ నేపథ్యంలో వాయిదా పడింది. లాక్ డౌన్ తర్వాత ఇటీవలే తిరిగి షూటింగ్ ప్రారంభించిన చిత్ర యూనిట్.. తాజాగా సోషల్ మీడియా వేదికగా షూటింగ్ కి సంబంధించిన అప్డేట్ ఇచ్చారు.

'ఆచార్య' సినిమా టాకీ పార్ట్ షూటింగ్ మొత్తం పూర్తి చేసినట్లు వెల్లడించిన చిత్ర బృందం.. రెండు పాటల చిత్రీకరణ మాత్రమే పెండింగ్ ఉన్నట్లు ప్రకటించారు. అంతేకాదు ఈ సందర్భంగా చిరంజీవి - చరణ్ లకు సంబంధించిన ఓ పోస్టర్ ని కూడా వదిలారు. ఇందులో ఇద్దరూ నక్సలైట్ గెటప్ లో ఉండగా.. చెర్రీ భుజం పై చిరు చెయ్యి వేసి చిరునవ్వులు చిందిస్తూ కనిపిస్తున్నారు. టాకీ పార్ట్ షూటింగ్ కంప్లీట్ అయింది కాబట్టి, మెగాస్టార్ బర్త్ డే కానుకగా ఆగస్ట్ 22న ఏదైనా అప్డేట్ వచ్చే అవకాశం ఉందని ఫ్యాన్స్ భావిస్తున్నారు. అలానే త్వరలోనే రిలీజ్ డేట్ పై క్లారిటీ వస్తుందని అనుకుంటున్నారు.

కాగా, 'ఆచార్య' చిత్రంలో కాజల్ అగర్వాల్ హీరోయిన్ గా నటిస్తుండగా.. రామ్ చరణ్ కు జోడీగా పూజాహెగ్డే నటిస్తోంది. సోనూసూద్ కీలక పాత్ర పోషిస్తున్నారు. ఈ చిత్రానికి మణిశర్మ సంగీతం సమకూరుస్తున్నారు. సురేష్ సెల్వరాజన్ ప్రొడక్షన్ డిజైనర్ గా వర్క్ చేస్తుండగా.. తిరు సినిమాటోగ్రఫీ అందిస్తున్నారు. నవీన్ నూలి ఎడిటింగ్ బాధ్యతలు నిర్వర్తిస్తున్నారు. కొణిదెల ప్రొడక్షన్స్ సమర్పణలో మ్యాట్నీ ఎంటర్టైన్మెంట్స్ బ్యానర్ పై నిరంజన్ రెడ్డి ఈ చిత్రాన్ని నిర్మిస్తున్నారు. చిరు - చరణ్ కలిసి నటిస్తున్న 'ఆచార్య' పై భారీ అంచనాలు ఉన్నాయి.