చరణ్ కోసం బాలీవుడ్ బ్యూటీని తీసుకొస్తున్నారా...?

మెగాస్టార్ చిరంజీవి - డైరెక్టర్ కొరటాల శివ కాంబినేషన్ లో 'ఆచార్య' అనే సినిమా తెరకెక్కుతున్న విషయం తెలిసిందే. కొణిదెల ప్రొడక్షన్స్ పై రామ్ చరణ్ మరియు మాట్నీ మూవీస్ నిరంజన్ రెడ్డి సంయుక్తంగా ఈ చిత్రాన్ని నిర్మిస్తున్నారు. చిరంజీవి కెరీర్లో 152వ చిత్రంగా తెరకెక్కుతున్న ఈ సినిమాపై భారీ అంచనాలే ఉన్నాయి. అందులోనూ మెగా పవర్ స్టార్ రామ్ చరణ్ కూడా కీలక పాత్రలో కనిపిస్తుండటంతో మెగా ఫ్యాన్స్ ఈ సినిమా కోసం ఆసక్తిగా ఎదురుచూస్తున్నారు. ఇక ఈ సినిమాలో చిరు దేవాదాయ శాఖలో పనిచేసే ఉద్యోగిగా నటిస్తున్నాడని.. దేవాదాయ శాఖలో జరిగే అక్రమాలు.. ప్రభుత్వ భూముల కబ్జాలు తదితర అంశాలతో సందేశాత్మకంగా ఈ సినిమా ఉండబోతోందని ప్రచారం జరుగుతోంది. ఇక 'ఆచార్య'లో కాజల్ హీరోయిన్ మెయిన్ హీరోయిన్ గా నటిస్తుండగా రెజీనా కాసాండ్రా స్పెషల్ సాంగ్ చేస్తోంది.

ఇదిలా ఉండగా మిల్కీ బ్యూటీ తమన్నా కూడా 'ఆచార్య'లో అతిధి పాత్రలో కనిపించనుందని ఇండస్ట్రీ వర్గాల్లో టాక్ వినిపిస్తోంది. రామ్ చరణ్ కి జోడీగా నటించబోతుందని వార్తలు వచ్చాయి. అయితే తమన్నా ఈ రోల్ చేయడానికి రెడీగా ఉన్నప్పటికీ డేట్స్ ఇష్యూ వచ్చే అవకాశం ఉందని ఆలోచిస్తున్నారట. ఈ నేపథ్యంలో బాలీవుడ్ బ్యూటీ జాన్వీ కపూర్ ని ఈ పాత్ర కోసం సంప్రదిస్తున్నారట. మరి గెస్ట్ రోల్ చేయడానికి అతిలోకసుందరి కూతురు ముందుకొస్తుందేమో లేదో చూడాలి. మొత్తం మీద మెగాస్టార్ 'ఆచార్య' సినిమాని భారీ క్యాస్టింగ్ తో తెరకెక్కిస్తున్నారని అర్థం అవుతోంది. కాగా ఈ సినిమాకి మణిశర్మ సంగీతం అందిస్తున్నారు. వీలైనంత త్వరగా ఈ చిత్రాన్ని ప్రేక్షకుల ముందుకు తీసుకురావాలని శరవేగంగా షూటింగ్ జరుపుకుంటుండగా కరోనా ఎఫెక్ట్ వల్ల నిలిచిపోయింది. త్వరలోనే షూటింగ్ స్టార్ట్ చేయాలని 'ఆచార్య' టీమ్ హైదరాబాద్ పరిసర ప్రాంతాల్లో దేవాలయం సెట్ వేస్తున్నారని సమాచారం.