యాక్షన్ డైరెక్టర్ కి వెంకీ కామెడీ మూవీనా ?

గత నెల బాలీవుడ్ లో విడుదలైన అజయ్ దేవగన్ దే దే ప్యార్ దేని వెంకటేష్ తో రీమేక్ చేస్తామని కొద్దిరోజుల క్రితం నిర్మాత సురేష్ బాబు ప్రకటించిన సంగతి తెలిసిందే. అక్కడ అదేమి ఇండస్ట్రీ హిట్ కాకపోయినా మంచి ఎంటర్ టైన్మెంట్ స్కోప్ ఉన్న సబ్జెక్టు కావడంతో వెంకీ అయితేనే న్యాయం చేయగలడని గుర్తించి ఆ మేరకు ఆలస్యం చేయకుండా హక్కులు కూడా కొనేశారు. ప్రకటనతో ఆపకుండా అప్పుడే బ్యాక్ గ్రౌండ్ వర్క్ మొదలుపెట్టారు.

ఇన్ సైడ్ టాక్ ప్రకారం దీనికి దర్శకుడిగా శ్రీవాస్ పేరు పరిశీలనలో ఉన్నట్టుగా తెలిసింది. గత ఏడాది బెల్లంకొండ సాయి శ్రీనివాస్ తో చేసిన సాక్ష్యం డిజాస్టర్ గా నిలిచాక శ్రీవాస్ కొంత గ్యాప్ తీసుకున్నాడు. కొత్త ప్రాజెక్ట్ ఏదీ అనౌన్స్ చేయలేదు. ఇప్పుడీ దే దే ప్యార్ దే రీమేక్ ని అతనితో చేయించే ఆలోచనలో సురేష్ ఉన్నట్టు వినికిడి. కానీ శ్రీవాస్ ఇప్పటిదాకా ఇలాంటి జానర్ ను ఎక్కువగా డీల్ చేయలేదు. గోపిచంద్ తో లౌక్యం బాగానే వర్క్ అవుట్ కాగా మంచు ఫ్యామిలీ మొత్తాన్ని హాస్యభరితంగా చూపాలనుకున్న పాండవులు పాండవులు తుమ్మెద టోటల్ గా మిస్ ఫైర్ అయ్యింది.

బాలయ్య డిక్టేటర్ రామ్ తో చేసిన రామ రామ కృష్ణ కృష్ణ రెండూ యాక్షన్ బేస్డ్ మూవీసే. అలాంటప్పుడు పూర్తి రొమాంటిక్ కామెడీ ఎంటర్ టైనర్ అయిన దే దే ప్యార్ దే శ్రీవాస్ ఎంతవరకు డీల్ చేయగలడు అనే అనుమానాలు రావడం సహజం. ఇది ఇంకా చర్చల దశలోనే ఉంది కాబట్టి అధికారిక ప్రకటన వచ్చాకే క్లారిటీ వస్తుంది. టబు ఓ పాత్రకు ఓకే చెప్పగా హీరో పాత్రను ప్రేమించే యువతిగా హీరొయిన్ ని ఇంకా ఎంపిక చేయాల్సి ఉంది. ఒరిజినల్ వెర్షన్ చేసిన రకుల్ ప్రీత్ సింగ్ ఆల్రెడీ వెంకీ మామలో చైతుతో చేస్తోంది కాబట్టి ఆ పేరుని పరిశీలనలోకి తీసుకోలేదని టాక్.