ఆ కొడవలితో ఫ్యాక్షన్ చూపిస్తావా చెర్రీ

టాలీవుడ్ లో స్టార్ హీరోల సినిమాలు ఫ్యామిలీ జోనర్ లో రూపొందినా.. యాక్షన్ కు ఏ మాత్రం కొదువ ఉండదు. హీరో సాఫ్ట్ వేర్ ఇంజినీర్ అయినా.. మరే ఇతర ప్రొఫెషన్ లో ఉన్నా.. ఫైటింగుల విషయంలో మాత్రం టాలీవుడ్ హీరోలకు తెగ రెచ్చిపోతారు. కానీ మన దగ్గర ఫ్యాక్షన్ సినిమాలకు ప్రత్యేక జోనర్ ఉంది. వాటిలో నరుక్కోవడాలను కాస్త ఎక్కువగా చూపిస్తారు.. అంతే తేడా.

ఇప్పుడు రామ్ చరణ్ నటించిన రంగస్థలంలో కూడా ఫ్యాక్షన్ ఛాయలు కనిపిస్తున్నాయి. రంగస్థలం టీం రీసెంట్ గా రిలీజ్ చేసిన పోస్టర్లలో వయొలెన్స్ కనిపించడం లేదు కానీ.. పక్కా మాస్ యాక్షన్ మూవీ అనే ఇండికేషన్స్ ఇస్తున్నారు. రామ్ చరణ్ కొడవలి పట్టుకున్న పోస్టర్ అయితే.. మరీ ఇంటెన్సివ్ గా ఉంది. ఇన్ సైడ్ టాక్ ప్రకారం కూడా.. మూవీలో చివరి అరగంట పాటు అటు ఎమోషన్స్.. ఇటు యాక్షన్ సీన్స్ పీక్ స్టేజ్ లో ఉంటాయని అంటున్నారు. అయితే.. ఈ సినిమాను 1980ల కాలం నాటి కథతో రూపొందించగా.. గోదావరి తీరంలో ఉన్న గ్రామం అని చెప్పారు కాబట్టి.. అది కచ్చితంగా సీమ ఫ్యాక్షన్ అయితే కాబోదు.

కానీ యాక్షన్ డోస్ కు ఏ మాత్రం తక్కువ చేయలేదట సుకుమార్. రామ్ చరణ్ సినిమాల్లో ఇప్పటివరకూ మాస్ ఎలిమెంట్స్ ఉన్నా.. ఇందులో క్లాస్ టచ్ తోనే మాస్ ప్రేక్షకులను ఆకట్టుకునే అంశాలను దిట్టంగా దట్టించారనే టాక్ వినిపిస్తోంది. తెలుగు ప్రేక్షకులకు గతంలోకి తీసుకెళ్లి కొత్తదనం చూపించడం ఖాయంగా కనిపిస్తోంది.