ఆయుర్వేద బిజినెస్ లోకి విలక్షణ నటుడు..?

విలక్షణ నటుడు జగపతి బాబు ఇటీవల ఆనందయ్య వైద్యానికి మద్దతు ఇవ్వడం ద్వారా వార్తల్లో నిలిచిన సంగతి తెలిసిందే. ''ఆనందయ్య ఆయుర్వేద మందు వాడిన వాళ్లలో నేనూ ఒకడిని. ఆయుర్వేదం తప్పు చేయదని నా నమ్మకం. ప్రకృతి, భూదేవి తప్పు చేయవు. డోస్‌ తీసుకున్నాక ఇప్పటివరకూ నాకెలాంటి కరోనా రాలేదు'' అని జగపతిబాబు చెప్పారు. అయితే ఆయుర్వేదం పై అంత నమ్మకమున్న సీనియర్ నటుడు.. ఇప్పుడు ఆయుర్వేద వ్యాపారంలో అడుగుపెట్టబోతున్నాడని వార్తలు వస్తున్నాయి.

జగపతిబాబు తన స్నేహితులతో కలిసి ఆయుర్వేద బిజినెస్ లోకి దిగుతున్నారట. ఈ క్రమంలో ఇప్పటికే హైదరాబాద్ లోని జూబ్లీ హిల్స్‌ లో ఓ ఆయుర్వేద ఆసుపత్రి నిర్మాణం కూడా చేపడుతున్నారని.. మరో రెండు మూడు నెలల్లో అన్ని పనులు పూర్తవుతాయని టాక్ వినిపిస్తోంది. జగపతి ఆధ్వర్యంలో నడిచే ఈ ఆయుర్వేద హాస్పిటల్ కు ఆయన డైరెక్టర్‌ గా వ్యవహరించనున్నారట. అయితే ఉన్నట్టుండి జగపతిబాబు ఇలా ఆయుర్వేదం వైపు మళ్లడానికి కారణం ఏంటని ఇండస్ట్రీ వర్గాల్లో చర్చించుకుంటున్నారు.

కాగా, కుటుంబ కథా చిత్రాలతో భారీ లేడీ ఫ్యాన్‌ ఫాలోయింగ్‌ సంపాదించుకున్న జగపతిబాబు.. కొన్నేళ్ల పాటు బిజీ హీరోగా వెలుగొందారు. ఇప్పుడు విలన్ కమ్ క్యారక్టర్ ఆర్టిస్టుగా మారిన జగపతి.. వరుస సినిమాలతో అదరగొడుతున్నారు. ఈ క్రమంలో ఇప్పుడు నటనతో పాటు బిజినెస్ పై ఫోకస్ పెడుతున్నట్లు తెలుస్తోంది.