దేవుడా ఆ హీరోను కాపాడు

బాలీవుడ్ నటీనటులే కాదు సగటు సినిమా ప్రేమికులు కూడా ఇదే కోరుకుంటున్నారు ఈ వార్త తెలిసినప్పటి నుంచి. ఇర్ఫాన్ ఖాన్ ఆరోగ్యం ఇంకా క్షీణించిందని ఒక లండన్ జర్నలిస్ట్ చేసిన ట్వీట్ ఇప్పుడు కలకలం రేపుతోంది. కొద్ది రోజుల క్రితం చికిత్స కోసం అమెరికా వెళ్లబోయే ముందు ఇర్ఫాన్ ఖాన్ తో పాటు అతని భార్య వదంతులు ప్రచారం చేయకండి అని కోరుతూ వ్యాధి గురించిన పూర్తి వివరాలు త్వరలోనే తెలియజేస్తామని చెప్పి వెళ్ళిపోయారు. క్యాన్సర్ అని తొలుత వినిపించినా మెదడుకు సంబంధించిన ఒక అరుదైన వ్యాధి సోకడం వల్లే ఇర్ఫాన్ ఖాన్ ఇక్కడ ట్రీట్మెంట్ దొరక్క అమెరికా వెళ్ళాల్సి వచ్చిందని పలు మీడియా కథనాలు వచ్చాయి. తాజగా వచ్చిన ట్వీట్ ని బట్టి చూస్తే ఇర్ఫాన్ ఖాన్ శరీరం ప్రస్తుతం చికిత్సకు స్పందించలేక అచేతనావస్థలోకి వెళ్లిందని సమాచారం.

ఇర్ఫాన్ ఖాన్ హీరోగా నటించిన బ్లాక్ మెయిల్ ఇటీవలే విడుదలైంది. టాక్ ఎలా ఉన్నా ఇర్ఫాన్ ఖాన్ పెర్ఫార్మన్స్ మాత్రం ప్రేక్షకులను మెప్పించింది. కలెక్షన్స్ కూడా బాగున్నాయి. భాగీ 2-హిచ్కీ లాంటి సినిమాల పోటీని తట్టుకుని మరీ ఆడుతోంది. ఈ సినిమా రిలీజ్ అయిన విషయం వస్తున్న స్పందన కూడా ఇర్ఫాన్ ఖాన్ తెలియకపోవడం నిజంగా విచారకరం. లైఫ్ అఫ్ పై-జురాసిక్ వరల్డ్ లాంటి హాలీవుడ్ సినిమాల్లో కూడా నటించిన ఇర్ఫాన్ ఖాన్ తెలుగులో మహేష్ బాబు సైనికుడులో విలన్ గా నటించాడు. విలక్షణ నటనలో నసీరుద్దిన్ షా-ఓంపురి-ప్రాణ్ ల తర్వాత ఇర్ఫాన్ ఖాన్ నే అంతటి ప్రతిభ ఉన్న నటుడిగా క్రిటిక్స్ సైతం మెచ్చుకుంటారు.

దుల్కర్ సల్మాన్ బాలీవుడ్ డెబ్యు మూవీ కార్వాన్ అనే సినిమా షూటింగ్ సగంలో ఉండగా ఇర్ఫాన్ ఖాన్ అనారోగ్యం పాలయ్యాడు. అందులో ఇతని భాగం పూర్తయ్యిందా లేదా క్లారిటీ లేదు. పజిల్ అనే మరో హాలీవుడ్ మూవీ విడుదల కావాల్సి ఉంది. ఇప్పుడు ఇర్ఫాన్ ఖాన్ ఆరోగ్యం కోసం ప్రతి ఒక్కరు వేడుకుంటున్నారు. అతని ఫ్యామిలీ మాత్రం రెండు వారాల క్రితం నుంచే అక్కడి పరిస్థితి దృష్ట్యా ఎటువంటి అప్ డేట్స్ ఇవ్వడం లేదు.