ద‌ళ‌ప‌తి 66లో మందుగుండు కూరుతున్నారుగా

ట‌పాసులు త‌యార‌య్యే ముందు మందుగుండు సామాగ్రిని సిద్ధం చేయాలి క‌దా! అలానే ఇప్పుడు దిల్ రాజు - వంశీ పైడిప‌ల్లి బృందం ద‌ళ‌ప‌తి 66 కోసం స‌ర్వ‌స‌న్నాహ‌కాల్లో ఉంది. ద‌ళ‌ప‌తి విజ‌య్ క‌థానాయ‌కుడిగా పైడిప‌ల్లి ద‌ర్శ‌క‌త్వంలో తెర‌కెక్క‌నున్న పాన్ ఇండియా సినిమా ఇప్ప‌టికే ప్రారంభ‌మైంది. ఈ సినిమాని భారీ కాస్టింగ్ తో తెర‌కెక్కించేందుకు అన్ని ఏర్పాట్లు చేసుకున్నారు పైడిప‌ల్లి.

తాజాగా ద‌ళ‌ప‌తి 66 లో న‌టిస్తున్న మ‌రో ఇద్ద‌రి పేర్లను టీమ్ అధికారికంగా ప్ర‌క‌టించింది. ఈ చిత్రంలో వెట‌ర‌న్ స్టార్స్ శ‌ర‌త్ కుమార్ .. ప్ర‌భు కీల‌క పాత్ర‌లు పోషించ‌నున్నారు. ఆ ఇద్ద‌రి చేరిక‌తో త‌మిళ బెల్ట్ లో మ‌రింత బ‌లం పుంజుకున్న‌ట్టే. అయితే పైడిప‌ల్లి తెలుగు నుంచి ఎవ‌రికి అవ‌కాశాలు క‌ల్పిస్తున్నారు? అన్న‌ది తెలియాల్సి ఉంది.

స్వింగ్ లో ఉన్న థ‌మ‌న్ స్వ‌రాలు

బ్యాక్ టు బ్యాక్ క్రేజీ సినిమాల‌కు ప‌ని చేస్తూ ఈ సీజ‌న్ లో సౌతిండియా బెస్ట్ మ్యూజిక్ డైరెక్ట‌ర్ గా వెలిగిపోతున్న‌ ఎస్.ఎస్.థ‌మ‌న్ ద‌ళ‌ప‌తి 66 చిత్రానికి సంగీతం అందిస్తున్నారు. అల వైకుంఠ‌పుర‌ములో త‌ర్వాత వ‌రుస బ్లాక్ బ‌స్ట‌ర్ల‌కు సంగీతం అందించిన థ‌మ‌న్ స‌ర్కార్ వారి పాట‌కు కూడా సంగీతం అందించారు. అత‌డి ఖాతాలో మ‌రో టాప్ మూవీగా విజ‌య్ సినిమా నిల‌వ‌నుంది. ద‌ళ‌ప‌తి 66 కి థ‌మ‌న్ సంగీత ద‌ర్శ‌కుడిగా ఫిక్స‌య్యాడు. శంక‌ర్ తో ఆర్.సి 15 లాంటి క్రేజీ పాన్ ఇండియా చిత్రానికి సంగీత ద‌ర్శ‌కుడిగా ప‌ని చేస్తున్న థ‌మ‌న్ కి ఇది మ‌రో జాక్ పాట్. ద‌ళ‌ప‌తి 66కి వంశీ పైడిప‌ల్లి ద‌ర్శ‌క‌త్వం వ‌హిస్తుండ‌గా శ్రీ వెంక‌టేశ్వ‌ర క్రియేష‌న్స్ ప‌తాకంపై దిల్ రాజు నిర్మిస్తున్నారు.

రాజుగారు ది గ్రేట్

ఆర్.సి 15 షూటింగ్ ని పూర్తి చేస్తూనే రాజు గారు ద‌ళ‌ప‌తి విజ‌య్ తో సినిమాని ప‌ట్టాలెక్కిస్తుండ‌డం ఆస‌క్తిక‌రం. ఒకేసారి అగ్ర హీరోల‌తో వ‌రుస‌గా భారీ పాన్ ఇండియా చిత్రాల్ని నిర్మిస్తూ గ‌ట్స్ ఉన్న నిర్మాత‌గా నిరూపించుకుంటున్నారు. ఆర్.సి 15 కోసం నెవ్వ‌ర్ బిఫోర్ అనేంత పెద్ద బడ్జెట్ ని పెడుతున్న దిల్ రాజు విజ‌య్ పైనా 100 కోట్లు పైగానే బ‌డ్జెట్ ని ఖ‌ర్చు చేయ‌నున్నారు. విజ‌య్ బీస్ట్ ఫెయిల్యూర్ త‌ర్వాత కొంత గ్యాప్ తీసుకుని బ‌రిలో దిగుతున్నారు.