శ్రీకాంత్ సినిమా వస్తోంది.. గుర్తించండయ్యా

90ల్లో సీనియర్ హీరో శ్రీకాంత్‌ కు కుటుంబ ప్రేక్షకుల్లో మంచి ఆదరణ ఉండేది. మీడియం రేంజ్‌ లో సినిమాలు చేస్తూ.. మినిమం గ్యారెంటీ హీరోగా ఉండేవాడు. ఐతే శ్రీకాంత్ లాగా స్టార్ ఇమేజ్ లేని హీరోలు ఒక దశ దాటాక నిలబడటం కష్టం. ఇలాంటి చాలామంది హీరోలు ఒక దశ దాటాక తెరమరుగైపోయారు. హీరోగా మార్కెట్ పోయిందని అర్థమవుతున్నపుడు.. లీడ్ రోల్స్ వదిలేసి క్యారెక్టర్ - విలన్ రోల్స్ చేయడం ఉత్తమం. శ్రీకాంత్ కూడా అలాంటి ప్రయత్నాలు చేయలేదనేమీ కాదు. హీరోగా కొనసాగుతూనే వేరే సినిమాల్లో ప్రత్యేక పాత్రలు పోషించాడు. కానీ హీరో వేషాల మీద మాత్రం ఆయన మోజు ఎంతకీ తీరడం లేదు. శ్రీకాంత్ సినిమా అంటే అటు బయ్యర్లు.. ఇటు ప్రేక్షకులు అసలేమాత్రం పట్టించుకోని పరిస్థితి వచ్చినా ఆయన మాత్రం లీడ్ రోల్స్ చేస్తూనే ఉన్నారు.

గత పదేళ్లలో శ్రీకాంత్ హీరోగా రెండంకెల సంఖ్యలో సినిమాలొచ్చాయి. వాటిలో ఏదీ కనీస స్థాయిలో కూడా ఆదరణ పొందలేదు. అయినా శ్రీకాంత్ మాత్రం దండయాత్ర చేస్తూనే ఉన్నాడు. చివరగా శ్రీకాంత్ హిట్టు కొట్టింది. ‘ఆపరేషన్ దుర్యోధన’తో. దానికి కొనసాగింపుగా ‘ఆపరేషన్ 2018’ అనే సినిమా చేశాడు. ఎప్పుడో పూర్తయి విడుదల కోసం చూస్తున్న ఈ చిత్రాన్ని ఎట్టకేలకు ప్రేక్షకుల ముందుకు తెస్తున్నారు. తెలంగాణలో ఎన్నికల హడావుడి నెలకొన్న నేపథ్యంలో ఇది మంచి టైమింగ్ అని భావించి డిసెంబరు 1న ఈ చిత్రాన్ని రిలీజ్ చేస్తున్నారు. ఐతే ఇప్పుడు తెలుగు ప్రేక్షకుల దృష్టంతా ‘2.0’ మీదే ఉంది. దీని తర్వాతి రోజు వస్తున్న ‘భైరవగీత’ను కూడా జనాలు పట్టించుకోవడం లేదు. అలాంటిది శ్రీకాంత్ సినిమాపై ఏమాత్రం ఆసక్తి ఉంటుందన్నది సందేహం. మరి ఆ చిత్రం ఎలాంటి ఫలితం రాబడుతుందో చూడాలి.