ఆ స్టార్ హీరో కూతురి పెళ్ళయిపోయింది

మామూలుగా తమిళ స్టార్ హీరో విక్రమ్ ను చూస్తే.. అసలు ఆయనకు పెళ్ళయ్యింది.. పెళ్ళీడుకు వచ్చిన పిల్లలున్నారు అంటేనే.. నమ్మశక్యంగా ఉండదు. తన లుక్ ను అయలా మెయిన్టయిన్ చేస్తాడు ఈ సీనియర్ హీరో. అయితే ఈయన తనయుడు ధృవ్ ఎప్పటి నుండో హీరోగా పరిచయం అవుతాడని అనుకుంటుండగా.. గతేడాది జూలైలో కూతురు అక్షిత ఎంగేజ్మంట్ పూర్తయ్యింది. ఈరోజు అసలు చడీచప్పుడు లేకుండా వివాహం కూడా పూర్తయ్యింది తెలుసా.

హీరో విక్రమ్ కూతురు అక్షిత.. కెవిన్ కేర్ (చిక్ షాంపూ మొదలగు ప్రొడక్టులు తయారుచేసే కంపెనీ) అధినేత సికె రంగనాథన్ కొడుకు మను రంజిత్.. చాలాకాలం ప్రేమించుకున్నారు. వారు డేటింగ్ కూడా చేశారు. గతేడాది జూలైలో వీరి ఎంగేజ్మంట్ అవ్వగా.. ఈరోజు ఉదయం తమిళనాడు మాజీ ముఖ్యమంత్రి కరుణానిధి ఇంట్లో ఏర్పాటు చేసిన కార్యక్రమంలో వీరు పెళ్ళిచేసుకున్నారు. ఇంతకీ వీరికీ కరుణానిధికీ లింకేంటి అనేనా మీ సందేహం?

కరుణానిధి మొదటి భార్య కొడుకు అయిన ఎం.కె.ముత్తు కూతురు.. ఈ కెవిన్ కేర్ అధినేత్ భార్య. అంటే ఈ అబ్బాయి ఎవరో కాదు.. కరుణానిధికి మునిమనవడు అనమాట. అయితే ఈరోజు పెళ్ళి సింపుల్ గా అయిపోయినా.. ఓ రెండు రోజుల్లో చెన్నయ్ లో ఎంగేజ్మంట్ మాత్రం గ్రాండ్ గా చేస్తారట. ఆ కార్యక్రమానికి సినీ ప్రముఖులు అందరూ వస్తారని టాక్.