హీరో సాయం తీసుకున్నా చనిపోయింది

అతని సినిమాలు తెలుగులో డబ్బింగ్ కాకపోయినా ఆన్ లైన్ లో తమిళ మూవీస్ చూసేవాళ్ళకు బాగా ఇష్టమైన పేరు విజయ్ సేతుపతి. పెర్ఫార్మన్స్ పరంగా ఇతనికి న్యూ జెనరేషన్ కమల్ హాసన్ అనే పేరుంది. అయితే వ్యక్తిత్వం విషయంలోనూ విజయ్ సేతుపతి చాలా రకాలుగా బయట ఆకట్టుకోవడం ఆదర్శంగా నిలుస్తుంది. ఇటీవలే అవుట్ డోర్ లో విపరీతమైన అభిమానుల రద్దీలోనూ ఏ మాత్రం విసుక్కోకుండా సెల్ఫీలు ఇవ్వడం ఆ వీడియో వైరల్ కావడం తెలిసిందే. తాజాగా మరో ఉదంతం ఇతన్ని సైతం కదిలించింది.

విజయ్ సేతుపతి ఇటీవలే కేరళలో అలపుజ్జా ప్రాంతంలో కొత్త సినిమా మన్మితాన్ షూటింగ్ లో ఉన్నాడు. బ్రేక్ టైంలో ఓ పెద్దావిడ తనకు మందులు కొనేందుకు డబ్బులు లేవని సహాయం చేయమని అర్థిస్తూ విజయ్ సేతుపతి దగ్గరకు వచ్చింది. అంతే మారు ఆలోచించకుండా తన దగ్గర పర్సులో ఉన్న డబ్బంతా పదుల సంఖ్యలో ఉన్న ఐదు వందల నోట్లు అక్కడికక్కడే ఆమెకు ఇచ్చేసి ఇంకా కావాలంటే అడగమని సెట్స్ లోకి వెళ్ళిపోయాడు. అయితే ఆ డబ్బు తీసుకున్న కొద్ది నిమిషాలకే ఆ పెద్దావిడ అక్కడే కళ్ళు తిరిగి పడిపోయింది.

వెంటనే హుటాహుటిన చంగనచెర్రి ప్రభుత్వాసుపత్రికి తీసుకెళ్ళారు. దురదృష్టవశాత్తు అక్కడికి వెళ్ళేలోపు ప్రాణాలు గాలిలో కలిసిపోయాయి. హీరో ఆరోగ్యం కోసం సహాయం చేస్తే అంత్యక్రియలకు వచ్చాయా అంటూ అందరు కంటతడి పెట్టుకున్నారు. అంత కన్నా విషాదం మరొకటి ఉంది. ఇంత దీనంగా విజయ్ సేతుపతి దగ్గర డబ్బులు తీసుకున్న ఆవిడ సినిమా ఆర్టిస్ట్. పేరు కవలం అచ్చమ్మ. జయరాం లాంటి స్టార్ హీరోల సినిమాలలో చాలా ఏళ్ళ క్రితం మంచి వేషాలే వేసింది. చివరి దశలో ఇలా దీనస్థితిలో ఉండిపోయింది. విషయం తెలుసుకున్న విజయ్ సేతుపతి తీవ్రంగా కలత చెందాడట. సహాయం అందకపోవడం ఒక బాధ అయితే ఆవిడ సినిమా నటి కావడం ఇంకా ఎక్కువ కలవరపెట్టిందట. ఇదేనేమో విధి రాత అంటే