చిట్టి ఆ లిస్ట్‌లో చేరిందంటే ఇక ద‌శ తిరిగిన‌ట్టే!

ఫరియా అబ్దుల్లా.. ఈ అందాల భామ గురించి ప్రత్యేకమైన పరిచయాలు అవసరం లేదు. హైదరాబాద్‌లో పుట్టి పెరిగిన ఈ ముద్దుగుమ్మ.. మోడలింగ్ లోకి ప్రవేశించింది. అలాగే థియేటర్ ఆర్టిస్ట్‌గా, యూట్యూబ‌ర్‌గా ప‌లు వీడియోలు చేసి పాపుల‌ర్ అయింది. ఆ త‌ర్వాత 'జాతిరత్నాలు' చిత్రంతో సినీ రంగ ప్రవేశం చేసింది. అనుదీప్ కెవి దర్శకత్వం వహించిన ఈ చిత్రంలో నవీన్‌ పొలిశెట్టి హీరోగా నటిస్తే.. ప్రియదర్శి, రాహుల్ రామకృష్ణ, మురళీ శర్మ, నరేష్ తదితరులు కీలక పాత్రను పోషించారు.

20201 లో విడుదలైన ఈ చిత్రం.. సంచలన‌ విజయాన్ని నమోదు చేసింది. ఎలాంటి అంచనాలు లేకుండా వచ్చిన ఈ చిత్రం పెద్ద విజయం సాధించింది. ఈ సినిమాలో 'చిట్టి' గా ఆక‌ట్టుకునే న‌ట‌న మ‌రియు మైమ‌ర‌పించే అందంతో తెలుగు ప్రేక్షకుల మనసు దోచేసింది ఫరియా. ఆ తర్వాత ఈ పొడుగు కాళ్ల సుంద‌రి అఖిల్ అక్కినేని హీరోగా తెర‌కెక్కిన 'మోస్ట్ ఎలిజిబుల్ బ్యాచ్‌ల‌ర్‌' చిత్రంలో ఓ చిన్న పాత్రను పోషించింది.

అలాగే అక్కినేని నాగార్జున, నాగ చైతన్య కలిసి నటించిన 'బంగార్రాజు' చిత్రంలో ఐటెం సాంగ్ లో మెరిసింది. ఈ రెండు చిత్రాలు సూపర్ డూపర్ హిట్ గా నిలిచాయి. దీంతో ఫ‌రియా ఉంటే సినిమా హిట్ అనే టాక్ న‌డిచింది. ఇక ఇప్పుడు ఫరియా 'లైక్ షేర్ అండ్ సబ్‌స్క్రైబ్' సినిమాతో ప్రేక్షకులను పలకరించబోతోంది. మేర్లపాక గాంధీ దర్శకత్వం వహించిన ఈ చిత్రంలో సంతోష శోభన్ హీరోగా నటించాడు.

నిహారిక ఎంట‌ర్‌టైన్‌మెంట్స్, అమృతా క్రియేష‌న్స్ బ్యానర్‌లపై వెంకట్ బోయినపల్లి నిర్మించిన ఈ చిత్రంలో బ్రహ్మాజీ, సుదర్శన్ తదితరులు కీలక పాత్రలు పోషించారు. లవ్ అండ్ కామెడీ ఎంట‌ర్టైన‌ర్‌గా రూపుదిద్దుకున్న ఈ చిత్రం న‌వంబ‌ర్ 4న గ్రాండ్ రిలీజ్ కాబోతోంది. ఈ నేప‌థ్యంలోనే మేక‌ర్స్ జోరుగా ప్ర‌చార కార్య‌క్ర‌మాల‌ను నిర్వహిస్తున్నారు.

అయితే ఈ సినిమా కనుక మంచి విజయం సాధిస్తే ఫరియా లక్కీ హీరోయిన్ల లిస్టులో చేరినట్టే అని అంటున్నారు. నిజంగా ఒక‌వేళ అదే జరిగితే చిట్టి దశ తిరుగుతుందని, స్టార్ హీరోల నుంచి సైతం ఆఫర్లు వస్తాయని సినీ విశ్లేష‌కులు అభిప్రాయపడుతున్నారు. మరి ఫరియా 'లైక్ షేర్ అండ్ సబ్‌స్క్రైబ్' సినిమాతో హిట్టు కొట్టి లక్కీ హీరోయిన్ల చెంత చేరుతుందా..? లేదా..? అన్నది చూడాలి.

కాగా, ఫ‌రియా ఇతర సినిమాల విషయానికి వస్తే.. ప్రస్తుతం ఈ బ్యూటీ మాస్ మహారాజ్‌ రవితేజకు జోడిగా 'రావణాసుర' అనే సినిమాలో నటిస్తోంది. సుధీర్ వర్మ దర్శకత్వం వహిస్తున్న ఈ చిత్రంలో ప్రియాంకా అరుళ్‌ మోహన్ మ‌రో హీరోయిన్‌గా న‌టిస్తోంది. అలాగే మేఘా ఆకాష్, దక్ష నగార్కర్, పూజిత పొన్నాడ, సుశాంత్, జగపతిబాబు తదితరులు కీలక పాత్రలు పోషిస్తున్నారు. త్వరలోనే ఈ చిత్రం ప్రేక్షకుల ముందుకు రానుంది.



నోట్ : మీ ఫీడ్ బ్యాక్ మాకు ముఖ్యం. క్రింద కామెంట్ బాక్స్ లో కామెంట్ చేయండి. మా కంటెంట్ నచ్చినా చెప్పండి. నచ్చకపోయినా చెప్పండి. హుందాగా స్పందించండి. abuse వద్దు.