బేబమ్మ అప్పుడే చంద్రముఖి అవ్వబోతుందా..!

హీరోయిన్స్ హర్రర్ సినిమాల్లో నటిస్తే ఎక్కువ శాతం మంది చంద్రముఖిలా నటించిందా... చంద్రముఖి పాత్రను డామినేట్ చేసిందా అన్నట్లుగానే చర్చించుకుంటారు. చంద్రముఖి సినిమాలో జ్యోతిక ఆ స్థాయిలో నటించి ఒక ట్రెండ్‌ సెట్‌ చేసింది. అందుకే ఫిల్మ్‌ మేకర్స్ అంతా కూడా తమ హర్రర్ సినిమాల్లో హీరోయిన్స్ ను ఆ స్థాయిలో చూపించేందుకు ప్రయత్నాలు చేస్తూ ఉంటారు. త్వరలో ఉప్పెన బ్యూటీ కూడా చంద్రముఖిలా మారబోతుందట.

సినీ వర్గాల నుండి అందుతున్న సమాచారం ప్రకారం... ప్రస్తుతం నాగ చైతన్య హీరోగా తమిళ దర్శకుడు వెంకట్‌ ప్రభు దర్శకత్వంలో ఒక ద్వి భాష సినిమా రూపొందుతున్న విషయం తెల్సిందే. సినిమాకు సంబంధించిన షూటింగ్ కార్యక్రమాల ప్రారంభం కు ఏర్పాట్లు జరుగుతున్నాయి. నాగ చైతన్య కు జోడీగా బేబమ్మ కృతి శెట్టిని ఎంపిక చేయడం.. పూజా కార్యక్రమాల్లో ఆమె పాల్గొనడం కూడా జరిగింది.

వెంకట్‌ ప్రభు ఈ సినిమాలో కృతి శెట్టిని హర్రర్‌ టచ్ ఉండే పాత్రలో చూపించబోతున్నట్లుగా తెలుస్తోంది. దెయ్యం పాత్రలో కృతి శెట్టి ని చూపించడంతో పాటు.. కొన్ని సన్నివేశాల్లో చాలా అందంగా క్యూట్‌ గా చూపించబోతున్నట్లుగా సమాచారం అందుతోంది. తెలుగు లో ఇప్పటికే మంచి గుర్తింపు దక్కించుకున్న కృతి శెట్టి అప్పుడే అలాంటి ప్రయోగాత్మక పాత్రను చేయడం చాలా పెద్ద విషయం అనే అభిప్రాయం వ్యక్తం అవుతోంది.

కెరీర్‌ లో ఇప్పుడిప్పుడే నిలదొక్కుకుంటున్న కృతి శెట్టి ఈ సమయంలో దెయ్యం పాత్రలో నటించడం అనేది సాహస నిర్ణయం. దర్శకుడు వెంకట్‌ ప్రభు కూడా ఆమె పై ఎంత నమ్మకం ఉంటే ఆమెను ఈ పాత్రకు ఎంపిక చేసి ఉంటాడు అనేది మరి కొందరి అభిప్రాయం. మొత్తానికి బేబమ్మ అప్పుడే చంద్రముఖి తరహా పాత్ర చేయడం అనేది ఆమె అభిమానులకు కూడా ఒకింత ఆందోళన కలిగిస్తుందట.