వైరల్ వీడియో: బ్యూటీ కర్రసాము ఇరగదీస్తోందే!

ఊరంతా ఒకదారైతే ఉలిపికట్టెది మరో దారి అని సామెత. సెలబ్రిటీలు అందరూ పొద్దున నుంచి ఒకే పని లో ఉన్నారు. ఈరోజు 'తండ్రుల దినం' కదా.. అందుకే వారిని ఏళ్ళ తరబడి వేధిస్తూ ఉన్నందుకు.. అయినా తండ్రులు ఓపిగ్గా ఉన్నందుకు వారికి ఫాదర్స్ డే శుభాకాంక్షలు చెప్తున్నారు. మరీ ఇంత మోటుగా కాదు కానీ "నాన్న నా ఫస్ట్ హీరో.. నాన్న నన్ను ఎంతో ఓపిగ్గా భరిస్తాడు.." ఇలాంటి మేసేజులతో సోషల్ మీడియా తెగ హంగామా జరుగుతోంది. ఇదంతా ఊరి తీరు.

మరి ఉలిపికట్టె లాగా ప్రవర్తిస్తున్న అదా శర్మ తీరు ఎలా ఉందంటే మారిషస్ దేశంలో ఒక బీచ్ లో చిట్టి నిక్కరు.. టీ షర్టు.. ఒక డెనిమ్ షర్ట్ వేసుకొని కర్రసాము చేస్తోంది. ఆ కర్రను ఏరకంగా తిప్పుతోంది అంటే పాత టాలీవుడ్ సినిమాల్లో పది పదిహేను మంది రౌడీలు హీరో ని రౌండప్ చేస్తే హీరో కర్రసాము చేసి 360 డిగ్రీలలో కర్రను తిప్పుతూ వారి మక్కెలు విరగ్గొడతాడు కదా.. సరిగ్గా అలానే చేస్తోంది. ఈ వీడియో ను తన ఇన్స్టా ఖాతా ద్వారా పోస్ట్ చేసి ఒక పెద్ద క్యాప్షన్ ఇచ్చింది.

"కమాండో 3' సెప్టెంబర్ 6 న విడుదల అవుతోంది. ఎవరైతే థియేటర్ కు పోకుండా ఉంటారో వారికి ఈ కర్ర దెబ్బలు తప్పవు. ఈ కర్రసాము నేర్చుకునేందుకు చాలా టైమ్ పట్టింది. నాకాలికి గాయాల గుర్తులు ఉన్నాయి. తలకు కూడా గాయాలయ్యాయి. కానీ నెర్చుకున్నాను. సిలంబం(కర్రసాము మరో పేరు) వీడియోలను త్వరలో అప్లోడ్ చేస్తాను" అంటూ క్యాప్షన్ ఇచ్చింది. ఏమాటకామాటే చెప్పుకోవాలి.. అదా కర్రసాము సూపరో సూపర్.

వీడియో కోసం క్లిక్ చేయండి