క్షణంలో చౌదరి, రెడ్డిలు ఎందుకంటే

కిడ్నాప్ థ్రిల్లర్ క్షణం ఇప్పటికే హిట్ స్టేజ్ ని దాటేసి సూపర్ హిట్ రేంజ్ లో దూసుకుపోతోంది. పెట్టుబడికి మూడు నాలుగు రెట్లు వసూలు చేసి నిర్మాతకు భారీ లాభాలు కూడా అందిస్తోంది. ఈ మూవీ సక్సెస్ లో లీడ్ కేరక్టర్లతో పాటు మరికొన్ని పాత్రలు కూడా కారణమే. అవే ఇన్ స్పెక్టర్ చౌదరి, అతని అసిస్టెంట్ రెడ్డి. ఇన్ స్పెక్టర్ చౌదరి పాత్రను సత్యం రాజేష్ చేయగా.. అతని అసిస్టెంట్ రోల్ ని మూవీ అంతా వెనుకనుంచే చూపిస్తారు. కనీసం ఒక్క చోట కూడా ఫేస్ కూడా చూపించరంటే ఈ కేరక్టర్ డిజైనింగ్ ఎంత విచిత్రంగా ఉంటుందో అర్ధం చేసుకోవచ్చు.

వీరిద్దరి మధ్య ట్రాక్ చాలా సీరియస్ డైలాగులతో సాగుతుంది. "నిజానికి మేము ఈ కానిస్టేబుల్ పాత్రకు ప్రసాద్ అని పేరు పెడదాం అనుకున్నాం. ఇన్ స్పెక్టర్ చౌదరి ముందు నుంచి అనుకున్నదే. కమెడియన్ శ్రీనివాసరెడ్డితో డబ్బింగ్ చెప్పించాలన్నది మా ఆలోచన. అందుకే ఈ రోల్ కి రెడ్డి అని పేరు ఫిక్స్ చేసి నిర్మాణం పూర్తి చేశాం. అయితే డబ్బింగ్ కోసం శ్రీనివాసరెడ్డి డేట్స్ ఇవ్వలేకపోయారు. అందుకే వేరే వాళ్లతో చెప్పించాల్సి వచ్చింది. అయితే, ఈ కాంబినేషన్ మాత్రం బాగా పండింది" అని చెప్పాడు అడివిశేష్.

క్షణం మూవీ సూపర్బ్ గా ఉందంటూ.. స్టైలిష్ స్టార్ అల్లు అర్జున్ లాంటి స్టార్స్ కూడా ప్రశంసలు కురిపిస్తుండడంతో.. ఇప్పుడు కలెక్షన్స్ మరింతగా ఊపందుకుంటున్నాయి. తెలుగులో సరికొత్త ప్రయోగాలతో సినిమాలు తీసేందుకు క్షణం ఊఫిరిపోసింది.