ఆలియా భట్, రాధికా ఆప్టే కావాలంటున్న శేష్

క్షణం.. వారం రోజులుగా టాలీవుడ్ తో పాటు బాలీవుడ్లో సైతం చర్చనీయాంశమవుతున్న సినిమా. తెలుగులో అద్భుతమైన స్పందన తెచ్చుకున్న ఈ సినిమా.. బాలీవుడ్ సెలబ్రెటీల దృష్టిని కూడా ఆకర్షించింది. ట్రేడ్ అనలిస్ట్ తరణ్ ఆదర్శ్ సైతం ఈ సినిమాపై ప్రశంసలు కురిపించడం.. బాలీవుడ్ సెలబ్రెటీల కోసం వేసిన స్పెషల్ షోలో కూడా మంచి స్పందన రావడంతో.. ఈ సినిమాను హిందీలోకి రీమేక్ చేసే ప్రయత్నాలు జరుగుతున్నాయి. ఐతే హిందీలో మిగతా పాత్రలు ఎవరు చేసినా ఒకే కానీ.. హీరో క్యారెక్టర్ మాత్రం తనే చేస్తానని.. దాన్ని ఇంకెవరికీ వదిలే ప్రసక్తే లేదని అడివి శేష్ చెప్పాడు.

‘‘రిషి పాత్రకు, నాకు చాలా పోలికలుంటాయి. అసలు సినిమాలో నేనే కనిపించాను. నాలాగే బిహేవ్ చేశాను. వేరే వాళ్లకు ఏదైనా కష్టం వచ్చిందంటే నిజ జీవితంలోనూ అలాగే స్పందిస్తా. రిషి పాత్రకు - నాకు ఉన్న తేడా ఒక్కటే. అతను ఆల్కహాలిక్. నేను మందు కొట్టను. హిందీలో ‘క్షణం’ సినిమాను రీమేక్ చేస్తే నేనే హీరోగా నటిస్తా. హీరోయిన్‌ గా ఆలియా భట్ అయితే బెటర్. అనసూయ పోషించిన కమిషనర్ పాత్రకు రాధికా ఆప్టే బాగా సూటవుతుందని శేష్ అభిప్రాయపడ్డాడు. ఇక ‘క్షణం’ సినిమాకు టాలీవుడ్ సెలబ్రెటీల నుంచి వచ్చిన రెస్పాన్స్ చూసి థ్రిల్లయిపోయానని శేష్ చెప్పాడు. ‘‘వేరే సినిమాలను రివ్యూ చేయకూడదు అన్న తన పాలసీని మార్చుకుని మరీ బన్నీ మా సినిమా గురించి మాట్లాడాడు. రానా అయితే ప్రెస్ మీట్ పెట్టి మరీ ఈ సినిమా గురించి చెప్పాడు. ఇంతకంటే మాకు ఏం కావాలి’’ అన్నాడు శేష్.