పవన్ ఆ సినిమా చూసి ఏమన్నాడు?

అడివి శేష్.. నటుడు కాకముందే దర్శకుడన్న సంగతి జనాలకు పెద్దగా తెలియదు. ‘వినాయకుడు’ సినిమాతో దర్శకుడిగా పరిచయమైన సాయికిరణ్ తమ్ముడైన శేష్.. అమెరికాలో ఉద్యోగం చేసుకుంటూనే అక్కడే సినిమాల మీద ఏవో కోర్సులు చేసి, ఎవరి మీదా ఆధారపడకుండా తనే స్వయంగా నిర్మాతగా మారి దర్శకుడిగా, హీరోగా సినిమా తీసి తెలుగు పరిశ్రమలోకి అడుగుపెట్టాడు. ఆ సినిమానే.. కర్మ. ఈ పేరుతో ఓ సినిమా వచ్చిన సంగతి కూడా చాలామందికి తెలియదు. ఐతే పెద్దగా సినిమాలు చూడని పవన్ కళ్యాణ్ ఈ సినిమా చూశాడట. చూడటమే కాదు.. శేష్ కు కాంప్లిమెంట్ కూడా ఇచ్చాడని ఓ ఇంటర్వ్యూ లో వెల్లడించాడు శేష్.

‘‘కర్మ సినిమాలో ఓ పాట చూసి ‘పంజా’ నిర్మాత నీలిమ తిరుమలశెట్టి దర్శకుడు విష్ణువర్ధన్ కు చూపించారు. అందులో నా పెర్ఫామెన్స్ నచ్చి పంజా సినిమాలో కీలక పాత్ర ఇచ్చారు. పవన్ కళ్యాన్ పక్కన ఛాన్స్ అనగానే పాత్ర ఏంటని కూడా తెలుసుకోకుండా ఒప్పుకున్నా. ఆ క్యారెక్టర్ కు వచ్చిన గుర్తింపు అంతా ఇంతా కాదు. పవన్ కళ్యాణ్ గారు నా గురించి తెలుసుకుని ‘కర్మ’ సినిమా చూశారు. తర్వాత నా దగ్గరికొచ్చి ‘నీ మొదటి సినిమా చూశా. గొప్ప సినిమా అనను కానీ.. గొప్ప ప్రయత్నం అని మాత్రం చెప్పగలను. సినిమాలు తీయడం మాత్రం ఆపొద్దు’ అంటూ అరగంట పాటు దాని గురించి చెప్పారు. ఆ అనుభూతిని మాటల్లో చెప్పలేను’’ అని శేష్ చెప్పాడు. పంజా సినిమా చూసి రాజమౌళి ఇచ్చిన కాంప్లెమెంట్ కూడా మరవలేనని అతనన్నాడు. ‘ఈ సినిమాలో బెస్ట్ థింగ్ ఏదైనా ఉందంటే అది నువ్వే’ అని రాజమౌళి కాంప్లెమెంట్ ఇచ్చినట్లు శేష్ తెలిపాడు.