బాహుబలి-2లోనూ అడివి శేష్

‘బాహుబలి: ది బిగినింగ్’ చూసిన జనాలు మరీ అంత తెలివి తక్కువవాళ్లా.. మతిమరుపు ఉన్నోళ్లా.. భద్రుడి తలను శివుడు తెగనరికాడో అందరూ చూశారు. మరి బాహుబలి రెండో భాగంలో ఆ పాత్ర ఎలా కంటిన్యూ అవుతుంది..? అడివి శేష్ ఈ సినిమాలో ఎందుకు నటిస్తాడు..? అనిపిస్తోంది కదూ. ఐతే ఇక్కడే ఓ ట్విస్టు ఉంది. భద్రుడు ‘బాహుబలి: ది కంక్లూజన్’లో ఉండడు కానీ.. అతడి తల మాత్రం ఈ సినిమాలో కీలక పాత్ర పోషిస్తుందట.

శివుడు కత్తి వేటుకు వేర్వేరుగా పడి ఉన్న తన కొడుకు మొండెం, తల చూసి విస్తుపోయిన భల్లాల దేవుడు.. భద్రుడి తలను తన వెంట తీసుకెళ్లి మొండేన్ని మాత్రమే ఖననం చేయిస్తాడట. మరి ఆ తలను చూసుకుని తన పగ రగిలిపోయేలా చేసుకుంటాడో ఏమో కానీ.. భద్రుడి ప్రెజెన్స్ మాత్రం ‘బాహుబలి-2’లోనూ కీలంగానే ఉంటుందట. అందుకే రాజమౌళి నుంచి అడివి శేష్ కు పిలుపు వచ్చినట్లు సమాచారం.

ప్రస్తుతం రాజమౌళి డెన్మార్క్ లో ఉన్నాడు. అక్కడ ప్రోస్తెటిక్ మేకప్ నిపుణులతో కలిసి చర్చలు సాగిస్తున్న జక్కన్న.. అక్కడికి శేష్ ను పిలిచినట్లు సమాచారం. శేష్ ను చూసి ప్రోస్తెటిక్ మేకప్ నిపుణులు అతడి తలను తయారు చేస్తారట. ఎండలు మండిపోతుండటంతో రామోజీ ఫిలిం సిటీలో జరుగుతున్న షూటింగుకి బ్రేక్ ఇచ్చేసిన జక్కన్న రెండో భాగానికి సంబంధించిన వేరే పనుల్ని పర్యవేక్షిస్తున్నాడు. జూన్ మొదటి వారంలో మళ్లీ ‘బాహుబలి-2’ రెగ్యులర్ షూటింగ్ మొదలవుతుందని సమాచారం.