అమీ తుమీకి అదనపు పని

నానితో జెంటిల్మన్ మూవీ తీసి ఫుల్ ఫాంలోకి వచ్చేశాడు దర్శకుడు ఇంద్రగంటి మోహన్ కృష్ణ. ఈయన తీస్తున్న కొత్త చిత్రం అమీతుమీ. అవసరాల శ్రీనివాస్.. అడవి శేష్.. ఈషా రబ్బా.. అదితి మ్యాకల్.. వెన్నెల కిషోర్ లు కీలక పాత్రలు పోషిస్తుండగా.. ఇప్పటికే ఈ సినిమా షూటింగ్ పూర్తయిపోయింది కూడా.

కేవలం 31 రోజుల్లోనే అమీతుమీ షూటింగ్ పూర్తయిపోగా.. ఇప్పుడు ముందుగా అనుకున్నట్లు కాకుండా.. డబ్బింగ్ పనులు చేపట్టాలని నిర్ణయించారు. నిజానికి ఈ సినిమాని సింక్ సౌండ్ కాన్సెప్ట్ తో తీయాలని భావించారు.. అలాగే చిత్రీకరించారు కూడా. డబ్బింగ్ లేకుండా ఇలా సింక్ సౌండ్ తో తెరకెక్కించడం ద్వారా అటు సమయం.. ఇటు డబ్బు రెండూ ఆదా అవుతాయి. కానీ తాజాగా విడుదల అయిన టీజర్ కు అంతగా రెస్పాన్స్ రాలేదు. పైగా కొన్ని విమర్శలను కూడా మూట కట్టుకోవాల్సి వచ్చింది. అందుకే ఇప్పుడు ముందుగా వేసుకున్న ఐడియాను మార్చి డబ్బింగ్ చెప్పించాలని నిర్ణయించారు.

జనాల నుంచి వచ్చిన ఫీడ్ బ్యాక్ ఆశించినట్లుగా లేదని.. అందుకే ఇప్పుడు రికార్డింగ్ చేపడుతున్నారని తెలుస్తోంది. షెడ్యూల్ చేసిన విడుదల తేదీకి ఇంకా సమయం ఉండడంతో.. మరిన్ని జాగ్రత్తలు తీసుకుని బెస్ట్ క్వాలిటీ ప్రొడక్ట్ నే ప్రేక్షకుల ముందుకు తీసుకొస్తామంటున్నారు నిర్మాత నరసింహారావు.