'అధికారమ్' ఫస్ట్ లుక్: లారెన్స్ - వెట్రిమారన్ కాంబోలో పాన్ ఇండియా ప్రాజెక్ట్..!

డ్యాన్స్‌ మాస్టర్‌ గా కెరీర్ ప్రారంభించిన రాఘవ లారెన్స్‌.. దర్శకుడిగా, హీరోగా కూడా మంచి గుర్తింపు తెచ్చుకున్నారు. తెలుగు తమిళ భాషల్లో సినిమాలు చేస్తున్న లారెన్స్.. హారర్‌ కామెడీ చిత్రాలతో ప్రేక్షకులను మెప్పించారు. చివరిగా 'కాంచన 3' చిత్రంలో హీరోగా నటించిన లారెన్స్.. 'లక్ష్మీ' సినిమాతో డైరెక్టర్ గా బాలీవుడ్ లో అడుగుపెట్టాడు. ప్రస్తుతం 'రుద్రన్' అనే సినిమాలో నటిస్తున్న రాఘవ.. ఈ సినిమా సెట్స్ పై ఉండగానే తాజాగా ''అధికారమ్'' అనే పాన్ ఇండియా ప్రాజెక్ట్ ను ప్రకటించారు.

నేషనల్ అవార్డ్ విన్నింగ్ డైరెక్టర్ వెట్రిమారన్ కథ - స్క్రీన్ ప్లే - డైలాగ్స్ అందిస్తున్న 'అధికారమ్' చిత్రానికి దురై సెంథిల్‌ కుమార్ దర్శకత్వం వహించనున్నారు. వెట్రి మారన్ దగ్గర డైరెక్షన్ డిపార్ట్మెంట్ లో వర్క్ చేసిన సెంథిల్.. ఇంతకముందు 'కోడి'(ధర్మయోగి) - 'పటాస్' వంటి చిత్రాలను తెరకెక్కించిన సంగతి తెలిసిందే. తాజాగా 'అధికారమ్' చిత్రాన్ని అధికారికంగా ప్రకటించిన మేకర్స్.. ఈ చిత్రానికి సంబంధించిన ఫస్ట్ లుక్ ని విడుదల చేశారు.

'అధికారమ్' ఫస్ట్ లుక్ పోస్టర్ లో రాఘవ లారెన్స్ మోస్ట్ వైలెంట్ గా కనిపిస్తున్నాడు. రక్తంతో తడిసిన దుస్తుల్లో ఉన్న లారెన్స్.. చేతిలో కత్తి పట్టుకొని నడుచుకుంటూ వస్తున్నాడు. రాఘవ కెరీర్ లో మొదటిసారి ఇలాంటి పాత్రలో నటిస్తున్నట్లు అర్థం అవుతోంది. అలానే వెట్రి మారన్ మునుపటి చిత్రాల మాదిరిగా బలమైన కంటెంట్‌ తో రాబోతున్నట్లు తెలుస్తోంది. 'అధికారమ్' చిత్రాన్ని వెట్రి మారన్ 'గ్రాస్ రూట్ ఫిల్మ్ కంపెనీ' సహకారంతో ఫైవ్ స్టార్ క్రియేషన్స్ పతాకంపై ఎస్. కదిరేసన్ నిర్మిస్తున్నారు. ఈ సినిమా ఈ ఏడాది చివర్లో సెట్స్ పైకి వెళ్లనుంది. ఇకపోతే రాఘవ లారెన్స్ నటిస్తున్న 'రుద్రం' చిత్రాన్ని కదిరేసన్ తెరకెక్కిస్తుండటం గమనార్హం.