వీడియో: ఈ పంది పాట్లేంటో!

ఒక పందిని హీరోని చేయాల‌నుకోవ‌డ‌మే గొప్ప అనుకుంటే పందితో బ్రేక్ డ్యాన్సులేయించాడు ర‌విబాబు. తొలి నుంచి ర‌విబాబు శైలి ఇదే. డైరెక్ట‌ర్ అవ్వాల‌నుకున్న ఈవీవీ పుత్ర‌ర‌త్నం న‌రేష్‌ ని `అల్ల‌రి` సినిమాతో హీరోని చేశాడు. ఎవ‌రూ ఊహించ‌ని రీతిలో న‌రేష్ త‌క్కువ స‌మ‌యంలో 50 సినిమాలు చేసిన రికార్డ్ బ్రేకింగ్ హీరో అయ్యాడు. త‌నీష్ లాంటి హీరోని `న‌చ్చావులే` లాంటి చిత్రంతో హీరోని చేసింది ర‌విబాబు. ఆ త‌ర్వాత త‌నీష్ కెరీర్ అంతే విజ‌య‌వంతంగా ర‌న్ అయ్యింది. హీరో అయిన‌వాడే దేవుడు! అనుకుంటుంటే.. ఆ దేవుడ‌య్యే ఛాన్స్ ర‌విబాబు ఆ ఇద్ద‌రికీ ఇచ్చాడు. అందుకే ఇప్పుడు పందిని హీరోని చేయ‌డం చాలామంది కుళ్ల‌కుపోవడానికి కార‌ణ‌మైంది.

పంది పిల్ల‌(పిగ్‌ లెట్‌)ని హీరోని చేయ‌డ‌మే కాదు.. పందిపిల్ల‌తో బ్రేక్ డ్యాన్స్ - షేక్ డ్యాన్స్ చేయించాడు. అదుగో అంటూ సినిమా తీశాడు. ఈ దీపావ‌ళి కానుక‌గా సినిమాని ప్ర‌పంచ‌వ్యాప్తంగా రిలీజ్ చేస్తున్నారు. సురేష్ ప్రొడ‌క్ష‌న్స్ కంపెనీ అత్యంత ప్ర‌తిష్ఠాత్మ‌కంగా ఈ చిత్రాన్ని నిర్మించింది. పంది పిల్ల యూనివ‌ర్శ‌ల్ కాబ‌ట్టి - ఇది అన్ని భాష‌ల్లోనూ రిలీజ్ చేయాల‌న్న‌ది సురేష్‌ బాబు ఆలోచ‌న‌. పైగా పూర్తి కామెడీ ఎంట‌ర్‌ టైన‌ర్‌ గా ఈ చిత్రం తెర‌కెక్కింద‌ని టీమ్ ప్ర‌చారం చేస్తోంది.

ఇంత‌కీ ఈ సినిమాలో పూర్ణ పాత్ర ఏంటి? అన్న‌ది అటుంచితే ప్ర‌మోష‌న్స్ ప‌రంగా త‌న‌ పాత్ర ఎంతో పెద్ద‌ది అని తాజాగా రివీలైన వీడియో సాంగ్ చెబుతోంది. `అవును` - `అవును2` చిత్రాల నాయిక‌గా పూర్ణ గ్లామ‌ర్ యాంగిల్‌ ని మ‌రోసారి ర‌విబాబు ప‌క్కాగా ఉప‌యోగించుకుంటున్నారు. వైట్ అండ్ వైట్ డ్రెస్ లో వైట్ బ్యాక్‌ గ్రౌండ్‌ లో తెర‌కెక్కించిన ఈ గీతం ఆక‌ట్టుకుంటోంది. ఇందులో పంది డ్యాన్సింగ్ విన్యాసాలు అద‌న‌పు బోన‌స్. వీఎఫ్ ఎక్స్‌ లో భారీ వ‌ర్క్ చేశార‌ని అర్థ‌మవుతోంది. ఇన్నాళ్లు బాబు+ బాబు (ర‌విబాబు - సురేష్‌ బాబు) వెయిటింగ్ చేసినందుకు ఈ సినిమా ఎలాంటి ఫ‌లితాన్ని ఇస్తుందో చూడాలి.