టీజర్ టాక్‌: అదుగో.. పరిచయం చేశాడు

చాలారోజుల నుండి క్రియేటివ్ డైరక్టర్ రవిబాబు సైలెంట్ గా ఉంటున్నాడు. అసలు తాను తీస్తున్న ''అదుగో'' సినిమా ఎందుకు లేటవుతోందో కూడా ఎవ్వరికీ చెప్పకుండా కామ్ గా తన పని తాను చేసుకుంటున్నాడు. ఇప్పుడు తన సినిమాలోని ముఖ్యమైన పాత్రను పరిచయం చేస్తూ ఒక టీజర్ తో విచ్చేశాడు. ఒక విధంగా చూస్తే ఇంప్రెస్ చేశాడనే చెప్పాలి.

ఒక పందిపిల్లతో మనోడు సినిమా తీస్తున్నాడంటే అందరూ షాకుకు గురయ్యారు. అయితే కేవలం ఆర్నెల్లు వయస్సున్న ఒక పిగ్లెట్ ను ఏకంగా ఆస్ర్టేలియా నుండి దిగుమతి చేసుకుని.. దానితో ''అదుగో'' అంటూ సినిమా తీసేశాడు. ఈ సినిమాలో పంది పిల్లే హీరో అంటూ చెబుతూ ఒక టీజర్ ను రిలీజ్ చేసి భలే తమాషా చేస్తున్నాడు రవిబాబు. పైగా ఈ వీడియోలో నువ్వు డైరక్టర్ వి ఏంట్రా అంటూ తన మీద తానే సెటైర్ కూడా వేయించుకున్నాడు. మొత్తానికి ఈ వీడియోలో చూపించిన పందిపిల్ల మాత్రం గ్రాఫిక్స్ లో ఆణిముత్యంగా చెక్కించాడు. బహుశా అందుకే సినిమా లేటై ఉండొచ్చు.

మనం 'ఈగ' వంటి టెక్నలాజికల్ వండర్ ను చూశాక.. ఇప్పుడు 'అదుగో'లో ఒక పంది పిల్ల సాహసాన్ని చూడబోతున్నాం అనమాట. రవిబాబు డైరక్షన్లో రూపొందిన ఈ సినిమాను సురేష్‌ బాబు నిర్మించారు. త్వరలోనే సినిమాను రిలీజ్ చేయడానికి సన్నాహాలు చేస్తున్నారట. అది సంగతి.