ఆదిపురుష్.. ఇది ఫిక్స్ అనుకోలేం

అనుకున్నదే అయింది. ‘ఆదిపురుష్’ సినిమా 2023 సంక్రాంతి రేసు నుంచి తప్పుకుంది. ఈ సినిమా టీజర్ మీద విపరీతమైన నెగెటివ్ ఫీడ్ బ్యాక్ రావడం, నభూతో అన్నట్లుగా ట్రోలింగ్ జరగడంతో చిత్ర బృందం బెంబేలెత్తిపోయిందన్నది స్పష్టం.

ఈ నెగెటివిటీ విషయంలో డ్యామేజ్ కంట్రోల్ కోసం త్రీడీలో టీజర్‌ను మీడియాకు ప్రదర్శించడం, ముఖ్య పాత్రల లుక్స్, వీఎఫెక్స్ విషయంలో తమ వెర్షన్ వినిపించే ప్రయత్నం చేయడం జరిగినా సరే.. నెగెటిివిటీ తగ్గకపోవడంతో సినిమా మీద మళ్లీ వర్క్ చేయక తప్పదని తేలిపోయింది.

వీఎఫెక్స్ విషయంలోనే కాక ముఖ్య పాత్రల లుక్స్ విషయంలోనూ కరెక్షన్లు చేయాలని ఫిక్సయ్యారు. ఇందుకోసం కొత్తగా బడ్జెట్ పెట్టడానికి కూడా రెడీ అయ్యారు. ఇందుకు టైం పట్టేలా ఉండడంతో అయిదు నెలల పాటు సినిమాను వాయిదా వేశారు.

‘ఆదిపురుష్’ టీం ప్రకటించిన కొత్త రిలీజ్ డేట్ 2023 జూన్ 16. కానీ ఈ తేదీకి కూడా సినిమా పక్కాగా రిలీజవుతుందనే గ్యారెంటీ లేదు. ఎందుకంటే ‘ఆదిపురుష్’ సినిమాను ప్రపంచ స్థాయిలో భారీగా రిలీజ్ చేయాలని, ముఖ్యంగా త్రీడీలో సినిమాను పెద్ద ఎత్తున ప్రదర్శించాలని.. అదే ప్రేక్షకులకు బెస్ట్ ఎక్స్‌పీరియన్స్ ఇస్తుందని చిత్ర బృందం భావిస్తోంది. కానీ జూన్ నెలలో రెండు భారీ హాలీవుడ్ సినిమాలు త్రీడీలో రిలీజవుతుండడంతో ఇండియాలోనే కాక విదేశాల్లో ‘ఆదిపురుష్’కు త్రీడీ స్క్రీన్లు దొరకడం చాలా కష్టమయ్యేలా ఉంది.

స్పైడర్ మ్యాన్ కొత్త వెర్షన్‌తో పాటు ట్రాన్స్‌ఫార్మర్స్ సిరీస్‌లో కొత్త సినిమా జూన్ తొలి రెండు వారాల్లో ప్రపంచవ్యాప్తంగా భారీ స్థాయిలో విడుదల కాబోతున్నాయి. మరి అవి థియేటర్లలో ఉండగా 16న ‘ఆదిపురుష్’ను రిలీజ్ చేయాలంటే కష్టమే. త్రీడీ స్క్రీన్లు చాలా పరిమితంగా దక్కుతాయి. అది ‘ఆదిపురుష్’కు చాలా ఇబ్బందికరమే. ప్రస్తుతానికి తమ చిత్రాన్ని వాయిదా వేస్తున్నట్లు చెప్పడానికి ఈ డేట్ ఇచ్చారు కానీ.. మళ్లీ డేట్ మారితే ఆశ్చర్యం లేదన్నది ట్రేడ్ వర్గాల మాట.


నోట్ : మీ ఫీడ్ బ్యాక్ మాకు ముఖ్యం. క్రింద కామెంట్ బాక్స్ లో కామెంట్ చేయండి. మా కంటెంట్ నచ్చినా చెప్పండి. నచ్చకపోయినా చెప్పండి. హుందాగా స్పందించండి. abuse వద్దు.