'ఆదిపురుష్' షూటింగ్ లేటెస్ట్ అప్డేట్..!

యంగ్ రెబల్ స్టార్ ప్రభాస్ ప్రస్తుతం నటిస్తున్న నాలుగు భారీ బడ్జెట్ చిత్రాల్లో ''ఆదిపురుష్'' ఒకటి. రామాయణ ఇతిహాస గాథ ఆధారంగా బాలీవుడ్ దర్శకుడు ఓం రౌత్ ఈ చిత్రాన్ని తెరకెక్కిస్తున్నారు. మైథలాజికల్ సినిమా కావడంతో అత్యున్నత సాంకేతిక పరిజ్ఞానంతో 3డీ లో ఈ మూవీని రూపొందిస్తున్నారు. ఇప్పటికే ఈ చిత్రానికి సంబంధించి 65 రోజుల మేర టాకీ పార్ట్ షూటింగ్ కంప్లీట్ అయ్యిందని తెలుస్తోంది.

ప్రస్తుతం 'ఆదిపురుష్' సినిమా కోసం ప్రభాస్‌ ముంబైలో ఉన్న సంగతి తెలిసిందే. అయినప్పటికీ డార్లింగ్ మాత్రం షూటింగ్‌ లో పాల్గొనడం లేదని తెలుస్తోంది. కేవలం డ్యాన్స్ రిహార్సల్స్‌ కోసమే అక్కడ మకాం వేశారట. సినిమాలోని ఓ స్పెషల్ సాంగ్ కోసం నాలుగు రోజులుగా ఓ స్టూడియోలో రిహార్సల్స్‌ చేస్తున్నారట. హీరోహీరోయిన్లు పాల్గొనే ఈ పాట చిత్రీకరణ వచ్చే వారం నుంచి ఉంటుందని టాక్.

'ఆదిపురుష్' చిత్రాన్ని 2022 ఆగస్టు 11న విడుదల చేయనున్నట్లు మేకర్స్ ఇప్పటికే ప్రకటించారు. వీలైనంత త్వరగా షూటింగ్ పూర్తి చేసి వీఎఫ్ఎక్స్ వర్క్స్ కి ఎక్కువ సమయం కేటాయించేలా దర్శకుడు ఓం రౌత్ ప్లాన్ చేస్తున్నారు. డిసెంబర్ నాటికి షూటింగ్ కంప్లీట్ చేసి.. పోస్ట్ ప్రొడక్షన్ వర్క్స్ నెమ్మదిగా చేసినా ఆగష్టు నాటికి సినిమా రెడీ అవుతుందని భావిస్తున్నారట. ఈ సినిమా కోసం సుమారు 450 కోట్ల బడ్జెట్ కేటాయించారని ప్రచారం జరుగుతోంది.

ఈ చిత్రంలో శ్రీరాముడిగా ప్రభాస్ నటిస్తుండగా.. సీత పాత్రలో బాలీవుడ్ భామ కృతి సనన్ నటిస్తోంది. ప్రతినాయకుడు లంకేశ్ గా సైఫ్ అలీఖాన్.. లక్ష్మణుడిగా బాలీవుడ్ యువ హీరో సన్నీ సింగ్ కనిపించనున్నారు. టీ-సిరీస్ ఫిలిమ్స్ బ్యానర్‌ పై భూషణ్ కుమార్ - కృష్ణ కుమార్ - ప్రసాద్ సుతార్ - రాజేష్ నాయర్‌ - ఓం రౌత్ లు కలసి 'ఆదిపురుష్' చిత్రాన్ని నిర్మిస్తున్నారు. బాలీవుడ్ సంగీత ద్వయం సాచెత్ తాండన్ - పరంపరా ఠాకూర్ ఈ చిత్రానికి సంగీతం సమకూర్చనున్నారు. ప్రభాస్ నటిస్తున్న ఈ స్ట్రెయిట్ హిందీ సినిమాపై భారీ అంచనాలు నెలకొన్నాయి.