ఈ వారం విజేత ఎవరు?

ఈ వారాంతంలో ఒకటికి నాలుగు సినిమాలు రిలీజయ్యాయి తెలుగులో. అందులో ఒక్కటే పక్కా తెలుగు సినిమా. అదే.. ఒక్కడు మిగిలాడు. సందీప్ కిషన్ సినిమా ‘కేరాఫ్ సూర్య’ ద్విభాషా చిత్రం. మిగతా రెండు (అదిరింది - డిటెక్టివ్.. తమిళ అనువాదాలు. ఈ నాలుగింట్లో పక్కా తెలుగు సినిమా పరిస్థితి ఏమంత బాగా లేదు. మిగతా మూడు సినిమాల పరిస్థితిగా బాగానే ఉంది. ఆశ్చర్యకరమైన విషయం ఏంటంటే.. ఈ నాలుగు సినిమాల్లోకి ‘అదిరింది’కే ఎక్కువ వసూళ్లు వస్తుండటం విశేషం. గురువారం సోలోగా రిలీజైన ఈ సినిమాకు తొలి రోజు ఆశ్చర్యకరంగా రూ.1.6 కోట్ల షేర్ రావడం విశేషం. ఇంతకుముందు విజయ్ సినిమా దేనికీ ఈ స్థాయిలో ఓపెనింగ్స్ రాలేదు.

శుక్రవారం మూడు సినిమాలు రిలీజవడంతో ‘అదిరింది’ పనైపోతుందని అనుకున్నారు కానీ.. ఆశ్చర్యకరంగా ఈ సినిమా గట్టిగానే నిలబడింది. కొత్త సినిమాల కంటే కూడా దీనికి ఎక్కువ వసూళ్లు వస్తుండటం విశేషం. సందీప్ కిషన్ సినిమా ‘కేరాఫ్ సూర్య’కు టాక్ బాగానే ఉండగా.. వసూళ్లు కూడా బాగానే ఉన్నాయి. ఐతే ‘ఒక్కడు మిగిలాడు’ పరిస్థితి మాత్రం దయనీయంగా ఉంది. ఇది మంచి ఉద్దేశాలతో తీసిన సినిమా అయినప్పటికీ సెంటిమెంట్ ఓవర్ డోస్ అయిపోవడంతో వసూళ్లు మరీ తీసికట్టుగా ఉన్నాయి. విశాల్ సినిమా ‘డిటెక్టివ్’ పర్వాలేదు. ‘అదిరింది’ ఒక డైరెక్ట్ తెలుగు సినిమా స్థాయిలో వసూళ్లు రాబడుతోంది. తమిళ వెర్షన్ ‘మెర్శల్’ మీద తలెత్తిన వివాదాలు దీనికి బాగానే కలిసొచ్చినట్లున్నాయి. మూడు వారాలు లేటుగా రిలీజ్ చేసినా ఇలాంటి రెస్పాన్స్ రావడం ఆశ్చర్యం కలిగించే విషయమే.