‘అదిరింది’లో మార్పు..ఇంకెన్ని మార్పులు చూడాలో!!

జబర్దస్త్‌ కు పోటీ అంటూ జీ తెలుగు వారు ప్రారంభించిన ‘అదిరింది’ కామెడీ షోకు ఆరంభంలోనే తడబాటు ఎదురవుతుంది. జబర్దస్త్‌ స్థాయిలో అదిరిందికి టీఆర్పీ రేటింగ్‌ రావడం లేదు. అయినా కూడా నిరుత్సాహపడకుండా ఈ షోను నిర్వాహకులు నెట్టుకు వస్తున్నారు. ఈమద్య యూట్యూబ్‌ లో కాస్త కామెడీ స్కిట్స్‌ ట్రెండ్‌ అవుతున్నాయి. అంతా సాఫీగా సాగుతున్న సమయంలో మొన్నటి వారం ఎపిసోడ్‌ లో ఆశ్చర్యకరంగా యాంకర్‌ సమీరా ప్లేస్‌ లో రవి మరియు భానులు వచ్చారు.

పటాస్‌ నుండి దిగుమతి అయిన వీరిద్దరు అదిరింది అదరగొడతాం అంటూ రంగంలోకి దిగారు. ఈ సమయంలోనే సమీరా మార్పుపై రకరకాలుగా వార్తలు వస్తున్నాయి. ఆమద్య పెళ్లి చేసుకున్న సమీరా ప్రస్తుతం గర్బవతి అని.. అందుకే ఆమె తప్పుకున్నట్లుగా ప్రచారం మొదలైంది. ఇంకా రకరకాలుగా పుకార్లు షికార్లు చేస్తున్న నేపథ్యంలో సమీరా సోషల్‌ మీడియా ద్వారా ప్రేక్షకుల ముందుకు వచ్చి అదిరింది షో నుండి తాను తప్పుకోవడానికి గల కారణం ఏంటీ అసలు ఏం జరిగింది అనే విషయాలను వెళ్లడి చేసింది.

తనకేమి సమాచారం ఇవ్వకుండానే షో నుండి తప్పించారు. నేను మీడియాలో చూసిన తర్వాత ఆశ్చర్య పోయాను. కొత్తగా వచ్చిన వారు ఎవరు అనేది కూడా నేను కనుక్కోలేదు. అదిరింది షో మంచి కోసం ప్రొడక్షన్‌ టీం ఈ నిర్ణయం తీసుకున్నట్లుగా నేను భావిస్తున్నాను. నన్ను తొలగించినా కూడా నాకు అదిరింది షో అంటే చాలా అభిమానం కనుక చూస్తూనే ఉంటాను అంది. ఇక తాను ప్రెగ్నెంట్‌ అంటూ వచ్చిన వార్తలను కూడా ఆమె కొట్టి పారేసింది. వారు తీసేయడం వల్లే తాను అదిరింది నుండి తప్పుకున్నాను అంతే తప్ప నా అంతట నేను షో నుండి తప్పుకోలేదు అంది.

ఇదే సమయంలో తనతో మొత్తం 26 ఎపిసోడ్స్‌ కు గాను ఒప్పందం కుదుర్చుకున్నారని.. కాని పది ఎపిసోడ్స్‌ కు నన్ను తొలగించడానికి కారణం ఏంటో తెలియదంది. జబర్దస్త్‌ ను కొట్టేందుకు అదిరిందికి చాలా మార్పులు అవసరం అంటూ అంతా అభిప్రాయం వ్యక్తం చేస్తున్నారు. యాంకర్‌ తో మార్పు ప్రారంభం అయ్యింది... ముందు ముందు మరెన్ని మార్పులు చూడబోతున్నామో..!