సమ్మోహనంగా నేనే మాట్లాడతా

మణిరత్నం చెలియా సినిమా ద్వారా తెలుగు ప్రేక్షకులకు పరిచయమైనా అది అంతగా ఆడకపోవడంతో హీరొయిన్ ఆదిరి హైదరి రావు మనవాళ్ళకు అంతగా కనెక్ట్ కాలేదు. సినిమా చూసినవాళ్లు మాత్రం తన మాయలో పడిపోయారు. కాని మొన్న జనవరిలో వచ్చిన పద్మావత్ లో దుర్మార్గుడైన ఖిల్జీకు సౌమ్యురాలైన భార్యగా తన నటన చూసి మెచ్చుకొని వారు లేరు. ప్రస్తుతం తెలుగులో తను చేస్తున్న స్ట్రెయిట్ మూవీ సమ్మోహనం. సుధీర్ బాబు హీరోగా ఇంద్రగంటి మోహనకృష్ణ దర్శకత్వం వహిస్తున్న ఈ మూవీ పోస్టర్ నుంచి టీజర్ దాకా ఫీల్ గుడ్ లవ్ స్టొరీ అనే హామీ అయితే ఇచ్చేసింది. ఇక దీని కోసం ఆదితి రావు హైదరి మరో సాహసోపేత నిర్ణయం తీసుకుంది. అదే స్వంతంగా డబ్బింగ్ చెప్పుకోవడం. స్వతహాగా హైదరాబాదీ అయిన ఆదితి పెరిగింది మాత్రం ఇక్కడ కాదు. అందుకే తనకు తోడా తోడా తెలుగు మాత్రమే వచ్చు. ఇంట్లో వాళ్ళకు మాత్రం అలవాటే.

సున్నితమైన భావోద్వేగాలు ఉన్న ప్రేమ కథ కనక ఎవరో చెబితే అంతగా సింక్ అవ్వడాని నువ్వే డబ్బింగ్ చెప్పమని ఇంద్రగంటి ప్రోత్సహించడంతో ఒప్పుకున్నాను అని చెబుతోంది ఆదితి. మొన్న టీజర్ లో ఉంది తన వాయిసేనట. ముందు నిత్యా మీనన్ తో చెప్పించాలి అనుకున్నప్పటికీ ఆదితి తెలుగులో తనే చెబుతాను అని ఒప్పుకోవడంతో ఫైనల్ చేసినట్టు టాక్. లాస్ట్ ఇయర్ అమీ తుమీ లాంటి హిట్ ఇచ్చిన ఇంద్రగంటి ఈసారి తన హాస్య శైలికి భిన్నంగా సెన్సిటివ్ లవ్ స్టొరీ ని ఎంచుకున్నాడు. సినిమాలంటే పడని ఒక యువకుడికి సినిమాలే జీవితంగా బ్రతికే నిజ జీవిత హీరొయిన్ కు మధ్య ప్రేమ కథనే ఇంద్రగంటి దీంట్లో సెట్ చేసుకున్నాడు. విడుదల తేది ఇంకా ఖారారు కాని ఈ మూవీ తనకు పెద్ద బ్రేక్ ఇచ్చి టాలీవుడ్ లో సెటిల్ చేస్తుంది అనే నమ్మకంతో ఉంది ఆదితి.