శంకర్ డాటర్ ఇటు డాక్టర్ .. అటు యాక్టర్!

సాధారణంగా అప్పట్లో ఏ హీరోయిన్ ను ఇంటర్వ్యూ చేసినా, "మీరు ఆర్టిస్ట్ కాకుండా ఉంటే ఏమై ఉండేవారు?" అనే ఒక ప్రశ్నను కామన్ గా అడిగేవారు. అప్పుడు వాళ్లు కూడా తమకి డాక్టర్ కావాలని ఉండేదనీ, అయితే అవకాశం వచ్చేసి అనుకోకుండా యాక్టర్ అయిపోయాము" అనే సమాధానాన్నే కామన్ గా చెబుతూ ఉండేవారు. ఎక్కువ మంది కథానాయికల నుంచి ఇదే సమాధానం రావడం వలన అది కామెడీ అయిపోయింది. అందువలన ఇప్పుడు కాస్త మార్చే చెబుతున్నారు.

నిన్నటితరం కథానాయికలలో చిత్రపరిశ్రమలోకి వచ్చిన తరువాత ఇక చదువు గురించి ఆలోచన చేసిన వాళ్లు చాలా తక్కువమంది. ఎందుకంటే ఆర్టిస్ట్ గా బిజీ అయితే చదువుకోవడానికి సమయం దొరకడం చాలా కష్టం. అయితే ఇప్పటి హీరోయిన్లు మాత్రం ఒక వైపున సినిమాలు చేసుకుంటూనే చదువును పూర్తి చేస్తున్నారు. ఎందుకంటే సినిమాలు ఎప్పటివరకూ తమని కాపాడుతూ వస్తాయో తెలియదు. చదువనేది ఒక రక్షణ కవచంలా ఎప్పటికీ కాపాడుతూనే వస్తుంటుంది. అందువలన వాళ్లు చదువును నిర్లక్ష్యం చేయడం లేదు.

స్టార్ హీరోయిన్ హోదాలో కొనసాగుతూనే సాయిపల్లవి వైద్య విద్యను పూర్తి చేసింది. అలాగే ఆ ఐశ్వర్య లక్ష్మి కూడా. తాజాగా ఆ జాబితాలో తమిళ డైరెక్టర్ శంకర్ రెండవ కూతురు 'అదితి శంకర్' కూడా చేరిపోయింది. చెన్నైలోని ప్రముఖ డీమ్డ్ యూనివర్సిటీలో ఎంబీబీఎస్ ను పూర్తిచేసింది. రీసెంట్ గా వర్శిటీ గ్రాడ్యుయేషన్ డే జరిగింది. ఈ సందర్భంగా రాష్ట్ర వైద్య ఆరోగ్య శాఖ కార్యదర్శి డాక్టర్ జె. రాధాకృష్ణన్ నుంచి ఆమె డిగ్రీ పట్టాను అందుకుంది. ఆ సమయంలో తన ఫ్యామిలీతో కలిసి దిగిన ఫోటోను షేర్ చేసింది.

విశేషం ఏమిటంటే శంకర్ కూతురు 'అదితి శంకర్' కథానాయికగా ఎంట్రీ ఇస్తోంది. కార్తి కథానాయకుడిగా నటిస్తున్న 'విరమన్' సినిమా ద్వారా ఆమె తమిళ తెరకి పరిచయమవుతోంది. ప్రస్తుతం ఈ సినిమా షూటింగు జరుగుతోంది. అంటే ఈ అమ్మాయి ఇటు డాక్టర్ .. అటు యాక్టర్ రెండూ ఒకేసారి అయిపోయిందన్న మాట. ఇక త్వరలో శంకర్ తనయుడు అర్జిత్ శంకర్ కూడా హీరోగా ఎంట్రీ ఇచ్చే అవకాశాలు లేకపోలేదు. ప్రస్త్తుతం చరణ్ సినిమాతో శంకర్ బిజీగా ఉన్న సంగతి తెలిసిందే. ఈ సినిమాపై అందరిలో భారీ అంచనాలు ఉన్నాయి. వచ్చే ఏడాదిలో ఈ సినిమా ప్రేక్షకుల ముందుకు రానుంది.