గూఢ‌చారీ ఎందుకీ గొడ‌వ‌?

హీరో.. ద‌ర్శ‌కుడు.. ర‌చ‌యిత ఇన్ని క్వాలిటీస్ ఒక‌రిలోనే ఉంటే అత‌డే అడివి శేష్‌. మ‌ల్టీట్యాలెంట్ తో టాలీవుడ్ ని ఉక్కు కౌగిలిలో బంధించాల‌ని చూస్తున్నాడు ఈ యంగ్ హీరో. అత‌డిలోని క్రియేటివిటీ పాళ్లు ఎంతో క్ష‌ణం, గూఢ‌చారి చిత్రాల‌తో అంద‌రూ తెలుసుకోగ‌లిగారు. గూఢ‌చారి స‌క్సెస్ కి శేష్ అన్నీ తానే అయ్యి ప‌ని చేశాడ‌న్న టాక్ కూడా వ‌చ్చింది. 2018 టాలీవుడ్ బెస్ట్ హిట్స్ లో ఒక‌టిగా గూఢ‌చారి నిలిచింది. అందులో మెజారిటీ భాగం క్రెడిట్ అడివి శేష్ కి వెళ్లింది.

అదంతా అటుంచితే ఆ సినిమా త‌ర్వాత అడివి శేష్ న‌టిస్తున్న తాజా సినిమా `2 స్టేట్స్‌` అప్ డేట్ ఏంటి? అంటే.. ఈ సినిమా షూటింగ్ కి ప‌లు ర‌కాల ఇబ్బందులు త‌లెత్తాయ‌ట‌. ద‌ర్శ‌కుడు వెంక‌ట్ రెడ్డితో శేష్ కి క్రియేటివిటీ ప‌రంగా కొన్ని ఇబ్బందులు త‌లెత్తాయ‌ని, ఆ క్ర‌మంలోనే అత‌డు సెట్స్ నుంచి కోపంగా వెళ్లిపోయార‌ని తెలుస్తోంది. దీంతో ద‌ర్శ‌కుడు గొడ‌వ సెటిల్ మెంట్ కోసం ద‌ర్శ‌కుల సంఘాన్ని ఆశ్ర‌యించార‌ట‌. అటుపై మూవీ ఆర్టిస్టుల సంఘం (మా) నుంచి అడివి శేష్ కి కాల్ వెళ్లింద‌ని తెలుస్తోంది. వి.వి.వినాయ‌క్ అంతా పెద్ద డైరెక్ట‌ర్ ద‌గ్గ‌ర ప‌ని చేసిన వెంక‌ట్ రెడ్డి సినిమాని ఆశించిన స్థాయిలో తీయ‌లేక‌పోతున్నాడ‌ని అడివి శేష్ భావిస్తున్నాడా? అస‌లు త‌ప్పిదం ఎక్క‌డ ఉంది? ఈ గొడ‌వ స‌ద్ధుమ‌ణిగేదెలా? అంటూ ఫిలింన‌గ‌ర్ లో ఆస‌క్తిక‌ర చ‌ర్చ సాగుతోంది.

బాలీవుడ్ బ్లాక్ బ‌స్ట‌ర్ `2స్టేట్స్` ని శేష్- వెంక‌ట్ రెడ్డి కాంబో రీమేక్ చేస్తున్నారు. అయితే ఈ గొడ‌వ‌ల వ‌ల్ల ఎన్నో ఆశ‌ల‌తో టాలీవుడ్ ఎంట్రీ ఇస్తున్న స్టార్ డాట‌ర్ శివానీ రాజ‌శేఖ‌ర్ ఇబ్బంది ప‌డ‌డంపైనా అభిమానుల్లో ఆస‌క్తిక‌ర చ‌ర్చ సాగుతోంది. క్రియేటివ్ డిఫ‌రెన్సెస్ ని ప‌రిష్క‌రించుకుని తిరిగి సెట్స్ కి వెళ‌తారా? లేక అడివి శేష్ బ‌య‌టికి వెళ‌తాడా? అంటూ మాటా మంతీ సాగుతోంది. కొన్ని స‌మ‌స్య‌ల‌కు కాల‌మే ప‌రిష్కారం చూపుతుందంటారు. కాస్త వేచి చూడాలేమో?