అందుకే ఎవరు సీక్రెట్ బయటపెట్టడం లేదా?

ఇటీవలే అడవి శేష్ కొత్త సినిమా ఎవరు తాలుకు ఫస్ట్ లుక్ ని టైటిల్ రూపంలో రిలీజ్ చేసిన సంగతి తెలిసిందే. పివిపి సంస్థ క్షణం తర్వాత శేష్ తో టై అప్ అవుతూ తీసిన మూవీ ఇదే. అయితే ఇప్పుడిది ఓ సూపర్ హిట్ స్పానిష్ మూవీకి రీమేక్ అంటూ వస్తున్న వార్తలు సంచలనంగా మారుతున్నాయి. ఇది అధికారికంగా చెప్పింది కాకపోయినా లీకవుతున్న న్యూస్ గట్టిగానే ప్రచారమవుతున్నాయి.

దాని ప్రకారం ది ఇన్ విజిబుల్ గెస్ట్ అనే మూవీ నుంచి ఎవరు స్ఫూర్తి పొందిందని వాటి సారాంశం. ఇదే సినిమా నాలుగు నెలల క్రితమే అమితాబ్ బచ్చన్-తాప్సీ కీలక పాత్రలలో బదలాగా వచ్చి సూపర్ హిట్ అయ్యింది. సుమారు 90 కోట్లకు పైగా వసూళ్లు రాబట్టి నిర్మాతగా షారుఖ్ ఖాన్ బ్యానర్ కు బ్లాక్ బస్టర్ ఇచ్చింది.

ఇప్పుడీ అడవి శేష్ ఎవరుకి ఇదే మూలమని సదరు గాసిప్స్ సారాంశం. అదే నిజమైతే లాయర్ గా అడవి శేష్ అనూహ్యంగా ఓ మర్డర్ కేసులో ఇరుక్కున్న అమ్మాయిగా రెజినా కనిపిస్తారు.

ఒకవేళ ఈ టాక్ నిజం కాకపోతే ఎవరు వెనుక ఏదో బ్రహ్మాండమైన సస్పెన్స్ ఉన్నట్టే. దీనికి సంబంధించి క్లారిటీ రావాలంటే ఇంకొద్ది రోజులు ఆగాలి. టీజర్ వచ్చాక ఓ అంచనాకు రావొచ్చు. గూడచారి తర్వాత అడవి శేష్ చేస్తున్న మూవీ కావడంతో ఎవరు మీద ప్రత్యేకమైన అంచనాలు ఉన్నాయి. సాహో విడుదలైన వారానికే వచ్చేందుకు రెడీ అవుతున్న ఎవరుని బెస్ట్ థ్రిల్లర్ గా తీర్చిదిద్దినట్టు సమాచారం. మరి ఎవరు వెనుక ఎవరున్నారో అసలు ఈ ఎవరు ఎవరో తెలియాలంటే ఎవరు ప్రమోషన్ స్టార్ట్ అయ్యే దాకా ఆగాల్సిందే.