పిక్ టాక్: గాఢమైన ప్రేమలో 'మేజర్‌' ప్రేమికులు..!

26/11 ముంబై ఉగ్రవాద దాడులలో వీరమరణం పొందిన మేజర్ సందీప్ ఉన్నికృష్ణన్ స్ఫూర్తిదాయకమైన జీవితం ఆధారంగా తెరకెక్కుతోన్న చిత్రం ''మేజర్''. అడివి శేష్ టైటిల్ రోల్ పోషిస్తున్న ఈ చిత్రంలో సయీ మంజ్రేకర్ - శోభితా ధూళిపాళ - ప్రకాష్ రాజ్ - రేవతి కీలక పాత్రలు పోషించారు. ప్రస్తుతం పోస్ట్ ప్రొడక్షన్ కార్యక్రమాలు జరుపుకుంటోన్న ఈ చిత్రాన్ని 2022 ఫిబ్రవరి 11న ప్రపంచ వ్యాప్తంగా విడుదల చేయనున్నారు.

ఈ నేపథ్యంలో తెలుగు హిందీ, మలయాళ భాషల్లో రూపొందుతున్న ''మేజర్'' సినిమాకు సంబంధించిన ప్రమోషన్లు ముమ్మరంగా జరుగుతున్నాయి. ఇప్పటికే విడుదలైన ప్రచార చిత్రాలు - టీజర్ మంచి స్పందన తెచ్చుకున్నాయి. ఈ క్రమంలో ఫస్ట్ సింగిల్ ని జనవరి 7న రిలీజ్ చేయనున్నట్లు మేకర్స్ వెల్లడించారు. 'హృదయమా' అనే గీతానికి శ్రీచరణ్ పాకాల సంగీతం సమకూర్చగా.., యువ గాయకుడు సిద్ శ్రీరామ్ ఆలపించారు. కృష్ణకాంత్ సాహిత్యం అందించారు.

ఈ సందర్భంగా అడివి శేష్ ట్వీట్ చేస్తూ.. ''ప్రేమ అంటే స్వచ్ఛమైనది. ఇన్నోసెంట్. నిజమైంది. 'హృదయమా' పాటలో సిద్ శ్రీరామ్ + శ్రీచరణ్ కలిసి మ్యాజిక్ క్రియేట్ చేస్తారు'' అని పేర్కొన్నారు. అలానే ఓ బ్యూటిఫుల్ పోస్టర్ ని షేర్ చేశారు. ఇది శేష్ - సయీ మంజ్రేకర్ ల మధ్య ఉద్వేగభరితమైన ప్రేమను.. ప్రేమ గాఢతను చూపుతుంది. వర్షంలో తడుస్తూ ఇద్దరు ఒకరినొకరు దగ్గరగా తీసుకొని కళ్ళు మూసుకొని ఉన్నారు.

'మేజర్' సినిమాలో సందీప్ త్యాగాల గురించి మాత్రమే కాదు.. ఆయన జీవితంలోని వివిధ దశలను కూడా చూపించనున్నారు. ఈ సినిమాలో శేష్ ప్రేమికురాలిగా సయి మంజ్రేకర్ నటించింది. 'గూఢచారి' ఫేమ్ శశి కిరణ్ తిక్కా ఈ చిత్రానికి దర్శకత్వం వహిస్తున్నారు. అడవి శేష్ కథ - స్క్రీన్ ప్లే సమకూర్చగా.. అబ్బూరి రవి డైలాగ్స్ అందించారు.

వంశీ పచ్చిపులుసు సినిమాటోగ్రఫీ నిర్వహించారు. మహేష్ బాబు జీఎంబీ ఎంటర్‌టైన్‌మెంట్ మరియు A+S మూవీస్‌ తో కలిసి సోనీ పిక్చర్స్ ఫిల్మ్స్ ఇండియా ''మేజర్'' నిర్మిస్తోంది.