చ‌ర‌ణ్ అక్క‌డ మీసం మెలేసే టైమొచ్చిందా?

మెగా ప‌వ‌ర్ స్టార్ రామ్ చ‌ర‌ణ్ ప‌రాయి గ‌డ్డ‌పై మీసం మెలేసే టైమొచ్చింది. అదే బాలీవుడ్‌. గ‌తంలో రామ్‌చ‌ర‌ణ్ `జంజీర్‌` సినిమాతో బాలీవుడ్ కు ప‌రిచ‌యం అయ్యారు. 1973లో ఇదే పేరుతో రూపొంది బ్లాక్ బ‌స్ట‌ర్ గా నిలిచిన చిత్రానికిది రీమేక్‌. అమితాబ్ బ‌చ్చ‌న్‌ని యాంగ్రీ యంగ్‌మెన్‌గా ప్ర‌జెంట్ చేసి బాలీవుడ్ కు సూప‌ర్ స్టార్‌ని చేసిన చిత్ర‌మిది. ఇంత‌టి సినిమాతో బాలీవుడ్ కు ప‌రిచ‌యం అయినా రామ్ చ‌ర‌ణ్ కు ఫ‌లితం లేకుండా పోయింది.

రిల‌య‌న్స్ ఎంట‌ర్‌టైన్‌మెంట్స్ అత్యంత ప్ర‌తిష్టాత్మకంగా నిర్మించిన ఈ చిత్రాన్ని అపూర్వ‌లాకియా తెర‌కెక్కించారు. యూనివ‌ర్స‌ల్ స్టార్ ప్రియాంక చోప్రా హీరోయిన్ గా న‌టించిన ఈ చిత్రంలో రియ‌ల్ స్టార్ శ్రీ‌హ‌రి కీల‌క పాత్ర‌లో న‌టించ‌గా సంజ‌య్ ద‌త్ విల‌న్ గా క‌నిపించారు. ఇంత మంది హేమా హేమీలు క‌లిసి న‌టించిన ఈ చిత్రం బాలీవుడ్ బాక్సాఫీస్ వ‌ద్ద బొక్క‌బోర్లా ప‌డింది. దీంతో తొలి చిత్రపై డిజాస్ట‌ర్ కావ‌డంతో బాలీవుడ్ మీడియా ఈ సినిమాకి 1 రేటింగ్‌తో దారుణంగా అవ‌మానించింది.

అప్ప‌టి నుంచి ఇప్ప‌టికి బాలీవుడ్ సినిమా ఊసెత్త‌ని రామ్ చ‌ర‌ణ్ `ఆర్ ఆర్ ఆర్‌` తో అక్క‌డ త‌న స‌త్తాని చాట‌బోతున్నారు. శుక్ర‌వారం విడుద‌లైన ఈ చిత్ర ట్రైల‌ర్ కు బాలీవుడ్ నుంచి వ‌చ్చిన స్పంద‌నే ఇందుకు అద్దంప‌డుతోంది. భారీ అంచ‌నాల మ‌ధ్య జ‌న‌వ‌రి 7న వ‌ర‌ల్డ్ వైడ్ గా విడుద‌ల‌కు సిద్ధ‌మ‌వుతున్న ఈ సినిమాతో బాలీవుడ్ గ‌డ్డ‌పై రామ్ చ‌ర‌ణ్ మీసం మెలేయ‌డం ఖాయం అని ఆయ‌న అభిమానులు చెబుతున్నారు. గ‌తంలో త‌న‌ని అవ‌మానించిన చోటే చ‌ర‌ణ్ త‌న స‌త్తాని నిరూపించుకోనున్నార‌ని అభిమానులు స‌వాల్ చేసి మ‌రీ చెబ‌తుండ‌టం విశేషం.