అప్పుడు పాట‌.. ఇప్పుడు డైలాగ్ తో త‌గ్గేదేలే

అల్లు అర్జున్ న‌టించిన `పుష్ప‌` విడుద‌లై రెండు వారాల‌వుతున్నా క్రేజ్ ఏ మాత్రం త‌గ్గ‌డం లేదు. సుకుమార్ అత్యంత భారీ స్థాయిలో ప్లాన్ చేసి ఈ మూవీని పాన్ ఇండియా మూవీగా మ‌లిచారు. భారీ అంచ‌నాల మ‌ధ్య విడుద‌లైన ఈ మూవీ ప్ర‌పంచ వ్యాప్తంగా సంచ‌ల‌న విజ‌యాన్ని సాధిస్తోంది. వ‌సూళ్ల ప‌రంగా బ‌న్నీ చిత్రాల్లో స‌రికొత్త రికార్డులు సృష్టిస్తోంది. ఈ నెల 17న ప్ర‌పంచ వ్యాప్తంగా ఐదు భాష‌ల్లో విడుద‌లై బాక్సాఫీస్ వ‌ద్ద ఎక్క‌డా త‌గ్గేదిలే అంటూ వీర విహారం చేస్తోంది.

ఈ మూవీ విడుద‌లై రెండు వారాలు గ‌డుస్తున్నా ఉభ‌య తెలుగు రాష్ట్రాల‌తో పాటు వ‌ర‌ల్డ్ వైడ్ గా మంచి వ‌సూళ్ల‌ని రాబ‌డుతూ ఆక‌ట్టుకుంటోంది. ఉత్త‌రాది రాష్ట్రాల్లో ఈ మూవీకి విశేష ఆద‌ర‌ణ ల‌భిస్తుండ‌టం ప‌లువురిని ఆశ్చ‌ర్యానికి గురిచేస్తోంది. తొలి రోజు నుంచే త‌న హ‌వాని కొన‌సాగిస్తున్న ఈ మూవీ క్రేజ్ రోజు రోజుకీ పెర‌గిపోతోంది. ఓ ప‌క్క ఈ సినిమా బాక్సాఫీస్ వ‌ద్ద భారీ వ‌సూళ్ల‌ని రాబ‌డుతూ 350 కోట్ల మార్కుని దాటేయ‌డానికి రెడీ అయినోతుంటే మ‌రో ప‌క్క ఈ మూవీలో `పుష్ప పుష్ప రాజ్ నీ య‌వ్వ త‌గ్గేదేలా..` అంటూ బ‌న్నీ చెప్పిన పాపుల‌ర్ డైలాగ్ ఇప్పుడు మ‌రింత వైర‌ల్ గా మారుతోంది.

సినిమాని ఎంజాయ్ చేస్తున్న చాలా మంది సెల‌బ్రిటీలు ఈ డైలాగ్ తో నెట్టింట వైర‌ల్ చేస్తున్నారు. ఇటీవ‌ల మ‌న ఇండియ‌న్ క్రికెట‌ర్ ర‌వీంద్ర జ‌డేజా ఇదే డైలాగ్ ని అనుక‌రిస్తూ ఇన్ స్టాలో పోస్ట్ చేసిన వీడియో వైర‌ల్ గా మారిన విష‌యం తెలిసిందే. ఇదే త‌ర‌హాలో మ‌రో క్రికెట‌ర్ డేవిడ్ వార్నర్ `పుష్ప‌` డైలాగ్ ని అనుక‌రించ‌డం ఆస‌క్తిక‌రంగా మారింది.

గ‌తంలో బ‌న్నీ న‌టించిన `అల వైకుంఠ పుర‌ములో` చిత్రంలోని `బుట్ట‌బొమ్మ‌.. ` పాట‌ని త‌న భార్య‌తో అనుక‌రించి నెట్టింట వైర‌ల్ గా మారిన ఈ ఆస్ట్రేలియ‌న్ క్రికెట‌ర్ మ‌రోసారి `పుష్ప పుష్ప రాజ్ నీ య‌వ్వ త‌గ్గేదేలా..` అంటూ చేసిన వీడియో ఇప్పుడు నెట్టింట వైర‌ల్ గా మారింది.