ఆసక్తికరంగా 'ఏజెంట్ వినోద్' ప్రీ-లుక్‌ పోస్ట‌ర్...!

టాలీవుడ్ డిస్ట్రిబ్యూష‌న్‌ కంపెనీగా పేరొందిన అభిషేక్ పిక్చ‌ర్స్ వారు మూవీ ప్రొడక్షన్ లోకి దిగిన సంగతి తెలిసిందే. ఈ క్రమంలో ''గూఢచారి' 'సాక్ష్యం' 'కేశవ' వంటి చిత్రాలను నిర్మించిన అభిషేక్ పిక్చ‌ర్స్ బ్యానర్ లో ''ఏజెంట్ వినోద్'' అనే సినిమా రూపొందిస్తున్నట్లు ప్రకటించారు. హాలీవుడ్ సినిమాలకు పనిచేసిన అనుభవం ఉన్న న‌వీన్ మేడారం ఈ చిత్రానికి దర్శకత్వం వహించనున్నారు. 'హారీపోట‌ర్‌' 'పైరేట్స్ ఆఫ్ ద క‌రీబియ‌న్‌' 'ప్రిన్స్ ఆఫ్ ప‌ర్షియా' '2012' 'బ్యాట్‌ మ్యాన్: ద డార్క్ నైట్' వంటి హాలీవుడ్ చిత్రాలకు వీఎఫ్ఎక్స్ ఆర్టిస్ట్‌ గా వర్క్ చేసారు మేడారం న‌వీన్. నేడు 'ఏజెంట్ వినోద్' చిత్రానికి సంబంధించిన ప్రీ లుక్‌ ను విడుద‌ల చేసింది చిత్ర యూనిట్.

కాగా ఏజెంట్ మరియు డిటెక్టీవ్ సినిమాలను తలపించేలా ఈ ప్రీ లుక్‌ కూడా డిజైన్ చేయబడింది. ఈ పోస్టర్ లో గన్, పుస్తకాలు, లాంత‌రు, టైపింగ్ మెషీన్‌, పెన్ను, కెమెరా, గ‌డియారం, తాళాలు వంటి పాత కాలం నాటి వ‌స్తువులతో ఇంట్రెస్ట్ క్రియేట్ చేస్తోంది. అంతేకాకుండా తుపాకీ పట్టుకున్న ఒక వ్య‌క్తి నీడ మరియు ర‌క్త‌పు మ‌ర‌క‌లు క‌నిపిస్తుండ‌టంతో ఇది క్రైమ్ థ్రిల్ల‌ర్ అని తెలుస్తోంది. అభిషేక్ పిక్చ‌ర్స్ బ్యాన‌ర్‌ పై అభిషేక్ నామా నిర్మిస్తున్న ఈ చిత్రానికి దేవాన్ష్ నామా మరియు ర‌వి పుట్టా స‌మ‌ర్ప‌కులుగా వ్య‌వ‌హ‌రిస్తున్నారు. హ‌ర్ష‌వ‌ర్థ‌న్ రామేశ్వ‌ర్ సంగీతం అందిస్తుండగా జ‌గ‌దీష్ చీక‌టి సినిమాటోగ్రాఫ‌ర్‌ గా వర్క్ చేస్తున్నారు. త్వరలో రానున్న ఫస్ట్ లుక్ పోస్టర్ లో నటీనటుల వివరాలు వెల్లడించే అవకాశం ఉంది.