ఫ‌స్ట్ లుక్ తో ఆస‌క్తిని రేకెత్తిస్తున్న సుమంత్‌

సుమంత్ హీరోగా న‌టిస్తున్న తాజా చిత్రం `అహం రీబూట్‌`. ప్ర‌శాంత్ సాగ‌ర్ అట్లూరి ద‌ర్శ‌క‌త్వం వ‌హిస్తున్నారు. వాయుపుత్ర ఎంట‌ర్ టైన్ మెంట్స్ ర‌ఘువీర్ గోరిప‌ర్తి, సృజ‌న్ య‌ర‌బోలు సంయుక్తంగా ఈ మూవీని నిర్మిస్తున్నారు. ప్ర‌స్తుతం `అన‌గ‌న‌గా ఒక రౌడీ` చిత్రంలో సుమంత్ వాల్తేరు సీను పాత్ర‌లో న‌టిస్తున్నాడు. ఈ మూవీ ప్ర‌స్తుతం చిత్రీక‌ర‌ణ ద‌శ‌లో వుంది. ఈ మూవీ చిత్రీక‌ర‌ణ లో వుండ‌గానే సుమంత్ తాజాగా `అహం రీబూట్‌` చిత్రాన్ని ప్రారంభించేశారు.

ప్ర‌స్తుతం ఈ మూవీ షూటింగ్ పూర్తి చేసుకుని పోస్ట్ ప్రొడ‌క్ష‌న్ కార్య‌క్ర‌మాలు జ‌రుపుకుంటోంది. తాజాగా ఈ చిత్ర ఫ‌స్ట్ లుక్ పోస్ట‌ర్ ని స్టార్ రైట‌ర్‌, డైరెక్ట‌ర్ విజ‌యేంద్ర ప్ర‌సాద్ విడుద‌ల చేశారు. ఈ పోస్ట‌ర్ లో సుమంత్ లుక్ భిన్న పార్శ్వాల్లో క‌నిపిస్తూ కొత్త‌గా వుంది. హెడ్ ఫోన్స్ పెట్టుకుని సుమంత్ త‌న హెల్ప్ డెస్క్ కు కాల్స్ చేస్తున్న వారి అభ్య‌ర్థ‌న‌లు వింటున్న‌ట్టుగా క‌నిపిస్తోంది. అయితే ఫ‌స్ట్ లుక్ పోస్ట‌ర్ లో సుమంత్ ఫేస్ పై ఒక ప‌క్క మాత్ర‌మే రెడ్ క‌ల‌ర్ లో హెల్ప్ అక్ష‌రాలు క‌నిపించ‌డం ఆస‌క్తిని రేకెత్తిస్తోంది.

అలాగే సుమంత్ పిల‌క‌తో క‌నిపిస్తున్న తీరు కూడా కొత్త‌గా వుంది. ఈ ఫ‌స్ట్ లుక్ పోస్ట‌ర్ పై ర‌చ‌యిత విజ‌యేంద్ర ప్ర‌సాద్ ఆస‌క్తిక‌ర వ్యాఖ్య‌లు చేశారు. ఈ కాన్సెప్ట్ విన‌గానే చాలా ఎక్సైట్ అయ్యాన‌ని, చాలా థ్రిల్లింగ్ గా అనిపించింద‌ని, ఇలాంటి క‌థ‌ల‌కు ఇప్పుడు డిమాండ్ పెరిగింద‌ని, సైక‌లాజిక‌ల్ థ్రిల్ల‌ర్ గా రూపొందుతున్న ఈ సినిమాలో న‌టిస్తున్న సుమంత్ కు నా అభినంద‌న‌లు అన్నారు. అంతే కాకుండా ఈ మూవీని నిర్మిస్తున్న నిర్మాత‌ల‌కు ఆల్ ద బెస్ట్ చెప్పారు.

అనుకోని సంఘ‌ట‌న‌లు మ‌నిషిలోని కొత్త కోణాల‌ను, కొత్త శ‌క్తులను బ‌య‌ట‌కు తెస్తాయి. అవి చాలా థ్రిల్లింగ్ గా ఉంటాయి. అలాంటి క‌థే అహం రీబూట్‌. సుమంత్ న‌ట‌న సినిమాకు హైలైట్ గా నిలుస్తుంది. `అహం రీ బూట్‌` ప్రేక్ష‌కుల‌కు స‌రికొత్త అనుభూతిని క‌లిగిస్తుంది. ఎప్పుడెప్పుడు ఈ మూవీని ప్రేక్ష‌కుల ముందుకు తీసుకురావాలా? అని చాలా ఎక్సైట్ మెంట్ తో ఎదురుచూస్తున్నాను అని ద‌ర్శ‌కుడు చెబుతున్నాడు. ఈ సైక‌లాజిక‌ల్ థ్రిల్ల‌ర్ ని జూన్ మొద‌టి వారంలో రిలీజ్ కు ప్లాన్ చేస్తున్నార‌ట‌. ప్ర‌స్తుతం పోస్ట్ ప్రొడ‌క్ష‌న్ కార్య‌క్ర‌మాలు జరుగుతున్నాయి.