వావ్.. రెండో ట్రైలరూ అదిరింది

ఎయిర్ లిఫ్ట్... ఇప్పుడు బాలీవుడ్ అంతా ఈ సినిమా గురించే చర్చించుకుంటోంది. 2016లో మున్ముందు ఎలాంటి సినిమాలైనా రావచ్చు గాక.. కానీ ఇదే ఈ ఏడాదికి బెస్ట్ మూవీ కావచ్చేమో అని అంచనా వేస్తోంది బాలీవుడ్. నెల కిందట రిలీజైన తొలి ట్రైలర్ చూసినపుడు జనాలకు కూడా అలాంటి ఫీలింగే కలిగింది. మన దేశం గొప్పదనాన్ని చాటే వాస్తవ కథాంశంతో తెరకెక్కిన ఈ సినిమాలో నటించినందుకు తాను గర్విస్తున్నానని.. ఈ సినిమా చూసిన ప్రతి భారతీయుడూ కూడా తనలాగే గర్వంగా ఫీలవుతాడని పదే పదే చెబుతున్నాడు అక్షయ్ కుమార్.

ట్రైలర్ విడుదలైన నాటి నుంచి ఈ సినిమా కోసం ప్రేక్షకులు ఆసక్తిగా ఎదురు చూస్తుండగా.. తాజాగా విడుదలైన రెండో ట్రైలర్ ఆ ఆసక్తిని రెట్టింపు చేసింది. మూడు నిమిషాల ఈ ట్రైలర్లో ప్రతి సన్నివేశమూ అద్భుతంగా అనిపిస్తోంది. ప్రతి ఒక్కరిలోనూ జాతీయ భావాన్ని తట్టి లేపే భావోద్వేగాలు ఈ సినిమాలో ఉన్నట్లు కనిపిస్తోంది. 1990 ప్రాంతంలో కువైట్ పై ఇరాక్ దాడి సమయంలో బందీలుగా చిక్కిన లక్షా 70 వేల మంది భారతీయుల్ని ఇండియన్ ఆర్మీ సాయంతో ఇండియాకు తీసుకురావడానికి ఓ వ్యక్తి చేసిన పోరాటమే ఈ సినిమా. అక్షయ్ కుమార్, నిమ్రత్ కౌర్ జంటగా నటించిన ఈ సినిమాకు రాజా కృష్ణమీనన్ దర్శకత్వం వహించాడు. ఈ నెల 22న ఈ చిత్రం ప్రేక్షకుల ముందుకొస్తుంది.