కబాలి లో ఆమె కూడా ఉందండోయ్

సూపర్ స్టార్ రజినీ కాంత్ కెరీర్ లో బిగ్గెస్ట్ బ్లాక్ బస్టర్ ‘రోబో’. ఈ సినిమాలో రజినీ ఎంతగా హైలైట్ అయ్యాడో.. హీరోయిన్ గా నటించిన ఐశ్వర్యారాయ్ కూడా అలాగే మెరిసింది. ముందు రజినీ పక్కన ఐశ్వర్యారాయ్ సూటవుతుందా అని అనుమానాలు వ్యక్తం చేశారు కానీ.. వీళ్ల మధ్య కెమిస్ట్రీ అద్భుతంగా పండి.. రోబో సినిమాకు అది హైలైట్ గా నిలిచింది. ఇప్పుడు మరోసారి ఈ జంట కనువిందు చేయబోతున్నట్లు సమాచారం. రజినీ కొత్త సినిమా ‘కబాలి’లోనూ ఐశ్వర్య ఓ కీలక పాత్ర చేయబోతోందట.

‘కబాలి’లో రాధిక ఆప్టే హీరోయిన్ గా నటిస్తున్న సంగతి తెలిసిందే. ఐతే ఆమెతో పాటు ఐశ్వర్య కోసం కూడా డైరెక్టర్ రంజిత్ ఓ పాత్ర తీర్చిదిద్దాడట. కథని కీలక మలుపు తిప్పే ఆ క్యారెక్టర్‌ లో ఐష్ మాత్రమే సరిపోతుందని...అందుకే ఈ స్పెషల్ రోల్‌లో ఆమే నటించాలని రజినీ స్వయంగా అడిగి ఒప్పించినట్లు సమాచారం. త్వరలోనే ఐశ్వర్య కబాలి యూనిట్ తో కలవబోతోంది. ‘లింగా’ సినిమా ఫ్లాపైన నేపథ్యంలో ఈ సినిమాపై ప్రత్యేకంగా దృష్టిసారించాడు రజినీ. చెన్నైలో ఓ షెడ్యూల్ పూర్తయిన అనంతరం యూనిట్ అంతా ఇప్పుడు మలేషియాల షెడ్యూల్లో ఉంది. అక్కడ భారీ స్థాయిలో యాక్షన్ సన్నివేశాలు చిత్రీకరిస్తున్నారు. వచ్చే ఏడాది వేసవికి ఈ సినిమా ప్రేక్షకుల ముందుకొచ్చే అవకాశముంది.