సమంత అంటే నాకు ఇష్టం .. ఆమెనే నా రోల్ మోడల్

ఐశ్వర్య రాజేశ్ .. చాలాకాలం క్రితం వచ్చిన రాజేంద్రప్రసాద్ 'రాంబంటు' సినిమాలో చైల్డ్ ఆర్టిస్ట్ గా కనిపించింది. ఆ తరువాత తమిళ సినిమాలనే ఎక్కువగా చేస్తూ వెళ్లింది. కథానాయికగా తమిళంలో మంచి క్రేజ్ తెచ్చుకుంది. అక్కడి కుర్ర హీరోలతో కలిసి నటిస్తూ, యూత్ నుంచి మంచి మార్కులు కొట్టేసింది. సినిమా వాతావరణంలో పుట్టి పెరగడం వలన ఐశ్వర్య రాజేశ్ కి నటన కొట్టిన పిండి. అందువలన ఎంతటి బరువైన పాత్రనైనా ఆమె చాలా తేలికగా చేసేయగలదు. 'కౌసల్య కృష్ణమూర్తి' సినిమాతో ఆమె మళ్లీ తెలుగు తెరకి వచ్చింది. ఫీమేల్ లీడ్ రోల్ తో నడిచే ఈ సినిమాతో నటన పరంగా ఆకట్టుకుంది.

ఆ తరువాత ఒకటి రెండు తెలుగు సినిమాలు చేసినప్పటికీ, 'వరల్డ్ ఫేమస్ లవర్' సినిమాలోని 'సువర్ణ' పాత్ర ఆమెకి మంచి గుర్తింపు లభించింది. ఈ సినిమాలో ముగ్గురు హీరోయిన్లు ఉంటారు. కానీ ఐశ్వర్య రాజేశ్ తో నడిచే ట్రాక్ మాత్రమే ప్రేక్షకులను ఆకట్టుకుంది. ఇక ఇటీవల 'టక్ జగదీష్' సినిమాలో ఆమె నానీ మేనకోడలిగా మెప్పించింది. తన పాత్ర నిడివి తక్కువే అయినా, ఎమోషన్స్ ను చాలా చక్కగా పలికించింది. అలాంటి ఐశ్వర్య రాజేశ్ తాజా చిత్రంగా ప్రేక్షకుల ముందుకు రావడానికి 'రిపబ్లిక్' సినిమా రెడీ అవుతోంది. అక్టోబర్ 1వ తేదీన ఈ సినిమాను భారీస్థాయిలో విడుదల చేస్తున్నారు.

ఈ నేపథ్యంలో ఈ సినిమా ప్రమోషన్స్ లో ఐశ్వర్య రాజేశ్ బిజీగా ఉంది. తాజా ఇంటార్వ్యులో "మీ రోల్ మోడల్ ఎవరు?" అనే ప్రశ్న ఆమెకి ఎదురైంది. అందుకు ఆమె స్పందిస్తూ .. " అంతకుముందు నేను సౌందర్యగారి అభిమానిని. ఎలాంటి పాత్రలోనైనా ఆమె అందంగా ఇమిడిపోయే తీరు నాకు ఎంతగానో నచ్చేది. అప్పట్లో ఆమె సినిమాలు తప్పకుండా చూసేదానిని. ఎంత సింపుల్ గా ఉండే పాత్రలోనైనా అంత అందంగా కనిపించే వారిని నేను చూడలేదు. ఇక ఇప్పటి హీరోయిన్స్ లో నాకు సమంత గారు అంటే చాలా ఇష్టం .. ఆమెనే నా రోల్ మోడల్.

అందంగా .. అమాయకంగా కనిపిస్తూ అద్భుతంగా నటించడం సమంతగారి ప్రత్యేకత. ఎలాంటి బరువైన పాత్రలోనైనా ఆమె మెప్పించగలదు. సరదాగా ఉండే పాత్రలలో ఆమె ఎంత గొప్పగా నటిస్తారో .. ఎమోషన్స్ తో కూడిన పాత్రల్లోను అంతే గొప్పగా ఆకట్ట్టుకుంటారు. కెరియర్ పరంగా ఆమె ఎదుగుతూ వచ్చిన తీరు నాకు ఆదర్శం" అంటూ చెప్పుకొచ్చింది. ఇక 'రిపబ్లిక్' సినిమాలో నేను ఎన్నారైగా 'మైరా' పాత్రలో కనిపిస్తాను. సరదాగా ఆడిపాడే పాత్ర కాదు ఇది .. చాలా పరిపక్వతతో నడుస్తుంది. ఈ పాత్ర నాకు మంచి పేరు తెస్తుందనే నమ్మకం ఉంది. ప్రస్తుతం తమిళంలో నాయిక ప్రధానమైన సినిమాలతో బిజీగా ఉన్నాను" అంటూ చెప్పకొచ్చింది