గ్లామర్ డోస్ పెంచే ఆలోచనలో ఐశ్వర్య రాజేశ్!

ఐశ్వర్య రాజేశ్ ఈ మధ్యనే హీరోయిన్ గా తెలుగులో కుదురుకోవడానికి గట్టి ప్రయత్నాలే చేస్తోంది. అలా అని చెప్పేసి ఈ అమ్మాయికి వెండితెర కొత్తేమీ కాదు. కోలీవుడ్ లో వరుసబెట్టి సినిమాలు చేస్తూనే, టాలీవుడ్ ను కూడా టచ్ చేద్దామనే ఆలోచనతో ఇక్కడ అడుగుపెట్టింది. హీరోయిన్ గా ఈ అమ్మాయి ఇక్కడ చేసిన 'కౌసల్య కృష్ణమూర్తి'నే మొదటి సినిమా అనుకుంటే పొరపాటే. తెలుగులో చాలాకాలం క్రితమే ఈ అమ్మాయి చైల్డ్ ఆర్టిస్ట్ గా 'రాంబంటు' సినిమా చేసింది. రాజేంద్రప్రసాద్ కథానాయకుడిగా 'బాపు' దర్శకత్వంలో ఈ సినిమా వచ్చింది.


చిన్నప్పుడే 'బాపు' దర్శకత్వంలో చేసిందంటే ఈ అమ్మాయి టాలెంట్ ఏమిటో అర్థం చేసుకోవచ్చు. యాక్టింగ్ అనేది ఆమె బ్లడ్ లోనే ఉంది మరి. ప్రముఖ నటుడు అమర్ నాథ్ కి ఈ అమ్మాయి మనవరాలు .. హాస్యనటి శ్రీలక్ష్మికి మేనకోడలు .. 'మల్లెమొగ్గలు' హీరో రాజేశ్ కి కూతురు. ఈ అమ్మాయి సహజమైన నటన వెనుక ఇంతటి నేపథ్యం ఉంది. అందువల్లనే ఈ అమ్మాయికి చిన్నప్పటి నుంచి షూటింగు వాతావరణం .. యాక్టింగ్ అలవాటే. కాకపోతే హీరోయిన్ గా టాలీవుడ్ కి కాస్త ఆలస్యంగా వచ్చింది అంతే.

'వరల్డ్ ఫేమస్ లవర్' సినిమాలో విజయ్ దేవరకొండకి ఒక జోడీగా ఐశ్వర్య రాజేశ్ నటించింది. ఈ సినిమాలో ఈ ట్రాక్ కి ఎక్కువ మార్కులు పడ్డాయి. ప్రస్తుతం తెలుగులో ఈ అమ్మాయి చేతిలో రెండు సినిమాలు ఉన్నాయి. నాని సరసన 'టక్ జగదీశ్' .. సాయిధరమ్ తేజ్ జోడీగా 'రిపబ్లిక్' చేస్తోంది. ఈ రెండు సినిమాలు కూడా ఈ ఏడాదిలోనే రానున్నాయి. కాస్త రంగు తక్కువగా కనిపించే ఈ అమ్మాయి, ఇప్పటివరకూ గ్లామర్ పాత్రలకు దూరంగా ఉంటూ వచ్చింది. ఈ మధ్య మాత్రం కాస్త పొట్టి డ్రెస్ లతో ఫొటో షూట్లు పెడుతూ, సోషల్ మీడియాలో జోరు పెంచుతోంది. అంటే తెరపై కూడా కాస్త గ్లామర్ డోస్ పెంచే ఆలోచనతో ఉన్నట్టుగానే అర్థం చేసుకోవాలి మరి.