మనోజ్ డైరెక్టర్ గురించి ఆసక్తికర విషయం!

మొద‌ట్నుంచీ వైవిధ్య భ‌రిత‌మైన పాత్ర‌ల్లో న‌టించేందుకు మంచు మ‌నోజ్ ప్ర‌య‌త్నిస్తూనే ఉన్నాడు. రొటీన్ కి భిన్నంగా ఉన్న పాత్ర‌ల‌పై మ‌నోజ్ కి కాస్త ఆస‌క్తి ఉంది. ప్ర‌స్తుతం మ‌నోజ్ న‌టిస్తున్న సినిమా కూడా ఇలానే రొటీన్ కు కాస్త భిన్న‌మైన స‌బ్జెక్టే. ప్ర‌స్తుతం ‘ఒక్క‌డు మిగిలాడు’ అనే చిత్రంలో న‌టిస్తున్నాడు. ఈ సినిమాలో క‌థ ఒక అంత‌ర్జాతీయ స్థాయి అంశం చుట్టూ తిరుగుతుంది. త‌మిళ టైగ‌ర్ ప్ర‌భాక‌ర‌న్ పాత్ర‌లో మ‌నోజ్ క‌నిపించ‌బోతున్నాడు. ఈ చిత్రానికి అజ‌య్ ఆడ్రూస్ నూత‌క్కి ద‌ర్శ‌కత్వం వ‌హిస్తున్నాడు. ద‌ర్శ‌కుడి పుట్టిన రోజు సంద‌ర్భంగా మ‌నోజ్ ఒక స్టిల్ ను విడుద‌ల చేశాడు. అదేంటంటే... హీరో మ‌నోజ్ ప‌క్క‌నే మ‌రో గ‌న్ ప‌ట్టుకుని ద‌ర్శ‌కుడు కూడా న‌టిస్తున్న స్టిల్‌! టేక్ కంటే ముందు హీరోకి సీన్ వివ‌రిస్తున్న స్టిల్ కాదండోయ్‌.. ద‌ర్శ‌కుడు అజ‌య్ ఆండ్రూస్ కూడా ఈ చిత్రంలో ఓ ప్ర‌ముఖ పాత్రలో న‌టిస్తూండ‌టం విశేషం.

నిజానికి, ఆండ్రూస్ తెలుగువాడే. కానీ, త‌మిళ ద‌ర్శ‌కుడిగా ఇండస్ట్రీకి ప‌రిచ‌యమ‌య్యాడు. రావ‌ణ‌దేశం అనే సినిమాతో ద‌ర్శ‌కుడయ్యాడు. ఈ చిత్రం కూడా శ్రీ‌లంకలోని అవ‌స్థలు ప‌డుతున్న త‌మిళ శ‌ర‌ణార్థుల గురించిన అంశ‌మే. శ్రీ‌లంక శ‌ర‌ణార్థుల‌కు సంబంధించి అంశాల‌పై ఆండ్రూస్ కు మంచి ప‌ట్టు ఉంద‌ని చెబుతారు. అందుకే, త‌మిళ టైగ‌ర్ల ఇష్యూని ఈ ద‌ర్శ‌కుడు క‌రెక్ట్ గా డీల్ చేయ‌గ‌లుగుతాడ‌ని అంటారు. ఇప్పుడు మ‌నోజ్ తో తెలుగులో తీస్తున్న సినిమా క‌థాంశం కూడా త‌మిళ టైగ‌ర్ల‌కు సంబంధించిన‌దే కావడం విశేష‌మే. అయితే, త‌మిళంలో తీసిన రావ‌ణ‌దేశం సినిమాని తెలుగులో రీమేక్ చేస్తున్నారేమో అని కూడా కొన్ని అనుమానాలు వ్య‌క్త‌మౌతున్నాయి. అధికారికంగా ఎలాంటి ప్ర‌క‌ట‌నా లేదులెండి. మొత్తానికి ఈ చిత్రంలో మ‌నోజ్ పాత్ర ప్ర‌స్తుతం చ‌ర్చ‌నీయాంశంగా మారింది. ప్ర‌భాక‌ర‌న్ పాత్ర‌లో మ‌నోజ్ న‌ట‌న ఎలా ఉంటుందో చూడాలి మ‌రి! ఈ చిత్రానికి ద‌ర్శ‌క‌త్వం వ‌హిస్తున్న ఆండ్రూస్ కూడా న‌టిస్తూ ఉండ‌టం మ‌రో విశేషంగా చెప్పుకోవాలి.

Like Us on Facebook : https://www.facebook.com/Tupakidotcom/