ఆర్జీవీ ని 'ఇండస్ట్రీ పెద్ద' గా చూడాలి..!!

ప్రస్తుతం టాలీవుడ్ లో 'ఇండస్ట్రీ పెద్ద' గురించి చర్చలు జరగుతున్న సంగతి తెలిసిందే. దర్శకరత్న దాసరి నారాయణరావు మరణం తర్వాత తెలుగు సినిమా పరిశ్రమలో ఆ స్థానం ఖాళీగా ఉంది. అయితే ఇప్పుడు ఇండస్ట్రీలో సమస్యల పరిష్కారానికి.. కుటుంబ పెద్దగా ముందుకు నడిపించడానికి ఎవరో ఒకరు బాధ్యతలు తీసుకోవాల్సిన సమయం వచ్చింది.

అన్ని వేళలా అందుబాటులో ఉండే మెగాస్టార్ చిరంజీవి సినీ ఇండస్ట్రీ పెద్దగా ఉండటం తనకు అస్సలు ఇష్టం లేదని.. బాధ్యత గల ఒక బిడ్డగా మాత్రమే ఉంటానని పేర్కొనడం చర్చనీయాంశంగా మారింది. 'ఇండస్ట్రీ పెద్ద' గా ఎవరు వ్యవహరిస్తారనే దానిపై పలు అభ్యంతరాలు వ్యక్తం అవుతున్నాయి. ఈ నేపథ్యంలో ఇండస్ట్రీ బాధ్యతలను తన గురువుకు అప్పగించాలని అంటున్నారు దర్శకుడు అజయ్ భూపతి.

'Rx 100' సినిమాతో సెన్సేషన్ క్రియేట్ చేసిన అజయ్ భూపతి.. వివాదాస్పద దర్శకుడు రామ్ గోపాల్ వర్మ శిష్యుడనే సంగతి తెలిసిందే. అయితే ఇప్పుడు తన గురువు ఆర్జీవీ ని ఇండస్ట్రీకి పెద్ద దిక్కుగా చూడాలని అజయ్ ఆశ పడుతున్నాడు. ఇదే విషయంపై సోషల్ మీడియా వేదికగా తన అభిప్రాయాన్ని వెల్లడించారు.

అజయ్ ట్వీట్ చేస్తూ.. ''మా బాస్ ( రాంగోపాల్ వర్మ ) ని ఇండస్ట్రీకి పెద్ద దిక్కుగా చూడాలని నా కోరిక... సామీ మీరు రావాలి సామీ'' అని పేర్కొన్నారు. దీనికి 'ఇండస్ట్రీ పెద్ద' అనే హ్యాష్ ట్యాగ్ ని జోడించి ఆర్జీవీ ట్విట్టర్ అకౌంట్ ని ట్యాగ్ చేసారు. దీనిపై నెటిజన్స్ ఫన్నీ కామెంట్స్ చేస్తున్నారు. టాలీవుడ్ కు ఎంతో మంది న్యూ టాలెంట్ ని పరిచయం చేసిన వర్మ.. ఇండస్ట్రీ పెద్దగా సమర్థవంతంగా తన బాధ్యతలను నిర్వహించగలరని కొందరు వ్యాఖ్యానిస్తున్నారు.

మరికొందరు మాత్రం ఆర్జీవీ ఇండస్ట్రీ పెద్దెంటీ సామీ అని సెటైర్స్ వేస్తున్నారు. అత్యంత స్వార్థపరుడు, తన కోసం తాను బతికే రామ్ గోపాల్ వర్మ.. ఇతరులకు సహాయం చేయడని.. ఇండస్ట్రీ పెద్దగా పనికిరాడని కామెంట్స్ పెడుతున్నారు. ఏదేమైనా అజయ్ భూపతి తన గురువు మీద ప్రేమతో గౌరవంతో ఇలాంటి ట్వీట్ చేసాడో.. లేదా వర్మ మీద సెటైర్ ఫన్నీగా వేసారో తెలియదు కానీ.. ప్రస్తుతం ఈ ట్వీట్ నెట్టింట వైరల్ అవుతోంది.