'RRR' సర్ప్రైజ్: 'లోడ్.. ఎయిమ్.. షూట్' అంటూ గర్జించిన అజయ్ దేవగన్

దర్శకధీరుడు రాజమౌళి ప్రతిష్టాత్మకంగా తెరకెక్కిస్తున్న ఈ ఫిక్షనల్ పీరియాడికల్ మూవీ 'ఆర్.ఆర్.ఆర్'. ఎన్టీఆర్ - రామ్ చరణ్ కలిసి నటిస్తున్న ఈ సినిమాతో బాలీవుడ్ నటుడు అజయ్ దేవగన్ టాలీవుడ్ లో అడుగుపెడుతున్నాడు. ఇప్పటికే విడుదలైన తారక్ కొమురం భీమ్ లుక్.. చరణ్ అల్లూరి సీతారామరాజు లుక్.. అలియా భట్ సీత లుక్ విశేష స్పందన తెచ్చుకున్నాయి. ఈ క్రమంలో నేడు (ఏప్రిల్ 2) అజయ్ దేవగన్ పుట్టిన రోజు సందర్భంగా ట్రిపుల్ ఆర్ టీమ్ ఆయన లుక్ ని రిలీజ్ చేస్తూ శుభాకాంక్షలు తెలియజేసింది.

'ప్రజలను శక్తివంతం చేయడం అతని లక్షణం.. అతని బలం అతని భావోద్వేగంలో ఉంటుంది' అంటూ ఆర్.ఆర్.ఆర్ టీమ్ విడుదల చేసిన ఫస్ట్ లుక్ మోషన్ పోస్టర్ లో అజయ్ దేవగన్ పవర్ ఫుల్ గా కనిపిస్తున్నాడు. స్వాతంత్ర్య సమరయోధుడిగా కనిపిస్తున్న ఆయన చుట్టూ శత్రువులు తుపాకులు ఎక్కుపెట్టి ఉండగా.. 'లోడ్..ఎయిమ్..షూట్' అంటూ అజయ్ గట్టిగా అరుస్తున్నారు. దీనికి కీరవాణి అందించిన నేపథ్య సంగీతం అదనపు ఆకర్షణగా నిలిచింది. ఈ మోషన్ పోస్టర్ తో ఇంతవరకూ చూడని ఓ కొత్త అవతారంలో పవర్ ఫుల్ క్యారెక్టర్ లో అజయ్ కనిపించబోతున్నాడని అర్థం అవుతోంది.

కాగా, దాదాపు 450 కోట్ల భారీ బడ్జెట్‌ తో డీవీవీ ఎంటర్టైన్మెంట్స్1 బ్యానర్ పై డీవీవీ దానయ్య 'ఆర్.ఆర్.ఆర్' సినిమాని నిర్మిస్తున్నారు. ఆలియా భట్‌ - ఒలీవియా మోరీస్‌ కథానాయికలుగా నటిస్తుండగా.. శ్రియ - సముద్రఖని - ఎలిసన్‌ డ్యూడీ - రేయ్‌ స్టీవెన్‌సన్‌ ముఖ్యపాత్రలు పోషించారు. విజయదశమి పండుగను పురస్కరించుకుని అక్టోబర్‌ 13న ఈ సినిమాని ప్రపంచ వ్యాప్తంగా విడుదల చేయనున్నారు.