'ఖైదీ' రీమేక్ ను ఖ‌రారు చేసిన హీరో, విడుద‌ల తేదీ కూడా!

గ‌త కొన్నాళ్లుగా బాలీవుడ్ లో త‌మిళ సినిమా 'ఖైదీ' రీమేక్ విష‌యంలో ఊహాగానాలు వినిపిస్తున్నాయి. సౌత్ లో ఆక‌ట్టుకున్న సినిమాల‌ను హిందీలో రీమేక్ చేసే ఆస‌క్తి ఉన్న ప‌లువురు హీరోల పేర్లు ఈ విష‌యంలో వినిపించాయి. ఒక ద‌శ‌లో ఈ సినిమాను స‌ల్మాన్ ఖాన్ హిందీలో రీమేక్ చేయ‌బోతున్నాడంటూ వార్త‌లు వ‌చ్చాయి. ఇది వ‌ర‌కూ కూడా సౌత్ లో హిట్టైన ప‌లు సినిమాల‌ను హిందీలో రీమేక్ చేసి హిట్లు కొట్టాడు స‌ల్మాన్. ఈ క్ర‌మంలో అత‌డి క‌న్ను కార్తీ న‌టించిన త‌మిళ సినిమా పై ప‌డిందేమో అని అంతా అనుకున్నారు.

అయితే అనూహ్యంగా ఆ విష‌యంలో మ‌రో పేరు తెర మీద‌కు వ‌చ్చింది. అత‌డే అజ‌య్ దేవ‌గ‌ణ్. ఇత‌డికి కూడా ప‌లు సౌత్ సినిమాల‌ను రీమేక్ చేసిన అనుభ‌వం ఉంది. ఆ సినిమాలు విజ‌యం సాధించ‌డంతో ఇప్పుడు మ‌రో రీమేక్ కు రెడీ అయిపోయిన‌ట్టుగా ఉన్నాడు. ఈ విష‌యాన్ని అధికారికంగా ప్ర‌క‌టించాడు అజ‌య్ దేవ‌గ‌ణ్. త‌ను ఖైదీ రీమేక్ లో న‌టించ‌బోతున్న విష‌యం వాస్త‌వ‌మే అని తాజాగా ప్ర‌క‌టించాడు ఈ బాలీవుడ్ హీరో.

అలాగే ఈ సినిమా విడుద‌ల తేదీని కూడా ప్ర‌క‌టించాడు. వ‌చ్చే ఏడాది ఫిబ్ర‌వ‌రి మూడో వారానిక‌ల్లా ఈ సినిమాను పూర్తి చేసి విడుద‌ల చేయ‌బోతున్న‌ట్టుగా అజ‌య్ ప్ర‌క‌టించాడు. ఇలా ఖైదీ హిందీ రీమేక్ ప‌ట్ల అధికారిక ధ్రువీక‌ర‌ణ వ‌చ్చింది. ఊహాగానాల‌కు తెర‌దించుతూ ఆ సినిమాను త‌నే రీమేక్ చేస్తున్న‌ట్టుగా ఈ బాలీవుడ్ హీరో ప్ర‌క‌టించుకున్నాడు.

ఇక ఇది వ‌ర‌కూ దృశ్యం, సింగం వంటి సినిమాల‌ను అజ‌య్ హిందీలో రీమేక్ చేశాడు. అవి ఓ మోస్త‌రు విజ‌యాన్ని అందుకున్నాయి. ఇప్పుడు ముచ్చ‌ట‌గా ఖైదీ సినిమాను రీమేక్ చేస్తున్నాడు ఈ సీనియ‌ర్ హీరో.