అజిత్ తీసిన ఫొటోల్లో శ్రుతిని చూస్కోండీ!

త‌మిళ క‌థానాయ‌కుడు అజిత్‌కి తెలియ‌ని విద్య అంటూ ఏమీ లేదు. నిజంగా ఆయ‌న ఓ ఆల్ రౌండ‌ర్‌. హెలికాఫ్ట‌ర్ న‌డ‌ప‌డం ద‌గ్గ‌ర్నుంచి అన్ని విష‌యాలూ ఆయ‌న‌కి తెలుసు. అజిత్‌లో ఎంత మంచి న‌టుడు ఉన్నాడో.. అంత మంచి ఫొటోగ్రాఫ‌ర్ కూడా ఉన్నాడు. ఆయ‌న కెమెరా చేత‌ప‌ట్టాడంటే ప్ర‌కృతి సౌంద‌ర్య‌మంతా కేప్చ‌ర్ కావాల్సిందే. ప్ర‌స్తుతం అజిత్ ఇట‌లీలోని మిల‌న్ లో ఉన్నాడు. శివ ద‌ర్శ‌క‌త్వంలో తెర‌కెక్కుతున్న ఓ సినిమా షూటింగ్ అక్క‌డ జ‌రుగుతోంది. అజిత్‌, శ్రుతిహాస‌న్ ల‌పై పాట‌ల్ని తెర‌కెక్కిస్తున్నారు. అయితే యూనిట్‌లో ఫొటోగ్రాఫ‌ర్ ఎవ్వ‌రూ లేర‌ట‌. అజితే స్టిల్ ఫొటోగ్రాఫ‌ర్ అవ‌తార‌మెత్తాడు.

అందంగా క‌నిపిస్తున్న త‌న హీరోయిన్ శ్రుతిహాస‌న్‌పై సెట్‌లోనే స‌ర‌దాగా ఓ ఫొటో షూట్ చేసేశాడు. ఆ ఫొటోలు మామూలుగా లేవు. వాటిలో శ్రుతి అందం మతి పోగొడుతోంది. వాటిని ట్విట్ట‌ర్ ద్వారా ఆదివారం రాత్రి త‌న అభిమానుల‌తో పంచుకొంది శ్రుతిహాస‌న్‌. అవి అజిత్ తీసిన ఫొటోలే అని అధికారికంగా తెలియ‌క‌పోయినా చిత్ర‌బృందంలోని కొద్దిమంది మాత్రం అవి అజిత్ తీసిన‌వే అని చెబుతున్నార‌ట‌. నిజంగా ఆ ఫొటోలు చూస్తే ప్రొఫెష‌న‌ల్ ఫొటోగ్రాఫ‌ర్ తీసిన‌ట్టుగానే ఉన్నాయి. ఇదివ‌ర‌కెప్పుడూ క‌నిపించ‌నివిధంగా శ్రుతి హాస‌న్ ఆ ఫొటోల్లో క‌నిపిస్తోంది.