అజిత్ సినిమా కొత్త పోస్టరొచ్చింది

తమిళ స్టార్ హీరో అజిత్ కొత్త సినిమా ‘వివేగం’కు సంబంధించి ఏదైనా కొత్త విశేషం బయటికి వచ్చిందంటే.. తమిళ జనాలే కాదు.. వేరే ఇండస్ట్రీల జనాలు కూడా ఆసక్తిగా చూస్తున్నారు. ఈ సినిమా ఫస్ట్ లుక్ విషయంలో తలెత్తిన వివాదం.. దాని గురించి జరిగిన పెద్ద చర్చే ఇందుకు కారణం. ‘వివేగం’ ఫస్ట్ లుక్ లో అజిత్ సిక్స్ ప్యాక్ లుక్ ఒరిజినల్ కాదని.. అది వీఎఫెక్స్ ద్వారా తీర్చిదిద్దిన సిక్స్ ప్యాక్ అంటూ అప్పట్లో సోషల్ మీడియాలో పెద్ద డిస్కషనే నడిచిన సంగతి తెలిసిందే. ఈ సినిమాకు సంబంధించి రిలీజ్ చేసిన రెండో లుక్ మీద కూడా చాలా కామెడీ నడిచింది. ఐతే ఆ తర్వాత అప్రమత్తమైన చిత్ర బృందం జాగ్రత్తగా కొత్త లుక్స్ రిలీజ్ చేస్తోంది.

తాజాగా అజిత్ పుట్టిన రోజు (మే 1) సందర్భంగా ‘వివేగం’ కొత్త లుక్ లాంచ్ చేశారు. ఇంతకుముందు ఒళ్లంతా గాయాలతో అజిత్ ఆన్ లొకేషన్ పిక్ ఒకటి లీక్ అయింది. ఆ లుక్ లోనే ఇప్పుడు కొత్త పోస్టర్ రిలీజ్ చేశారు. భారీగా ఉన్న చెట్టు దుంపను ఎత్తిపట్టి ఫెరోషియస్ గా కనిపిస్తున్నాడు ఈ పోస్టర్లో అజిత్. ఈ లుక్ కు మంచి స్పందనే వస్తోంది. ఐతే యాంటీ ఫ్యాన్స్ దీని మీద కూడా కామెడీలు షురూ చేశారు సోషల్ మీడియాలో. ఐతే అజిత్ అభిమానులు మాత్రం ‘తల సూపర్’ అంటూ సంబరాలు చేసుకుంటున్నారు. నిన్నట్నుంచి ‘హ్యాపీ బర్త్ డే తల’ హ్యాష్ ట్యాగ్ సోషల్ మీడియాలో హల్ చల్ చేస్తోంది. అజిత్ తో ‘వీరం’.. ‘వేదాళం’ లాంటి సూపర్ హిట్లు తీసిన శివ దర్శకత్వంలో రూపొందుతున్న ‘వివేగం’లో అజిత్ సరసన కాజల్ నటిస్తోంది. ఈ చిత్రం ఆగస్టులో ప్రేక్షకుల ముందుకొస్తుంది.

Like Us on Facebook : https://www.facebook.com/Tupakidotcom/