‘స్టార్ వార్స్’ తర్వాత అజిత్ సినిమానే..

తెలుగులో.. తమిళంలో అత్యధిక వ్యూస్ అని.. లైకులని.. దక్షిణాదిన నెంబర్ వన్ అని.. ఇండియాలో హైయెస్ట్ అని.. టీజర్లు.. ట్రైలర్లకు వచ్చే యూట్యూబ్ వ్యూస్ లైకుల గురించి గొప్పగా చెప్పుకోవడం చూస్తుంటాం. ఐతే ఇప్పుడు ఓ తమిళ సినిమా టీజర్.. ఈ హద్దులన్నీ దాటేసి ప్రపంచ స్థాయికి చేరిపోయింది. ప్రపంచంలో అత్యధిక లైకులు తెచ్చుకున్న టీజర్ల జాబితాలో అజిత్ మూవీ ‘వివేగం’ టీజర్ రెండో స్థానానికి చేరుకుని సంచలనం సృష్టించింది. ఈ టీజర్ కు ఇప్పటిదాకా 5 లక్షల 28 వేల లైకులు రావడం విశేషం. ఇండియాలో ఏ టీజర్ కూడా ఇప్పటిదాకా యూట్యూబ్ లైకుల్లో 5 లక్షల మార్కును కూడా అందుకోలేదు.

‘స్టార్ వార్స్: ది లాస్ట్ జేడి’ ట్రైలర్ వరల్డ్ వైడ్ అత్యధిక లైక్స్ తెచ్చుకుంది. ఈ ఏడాదే రిలీజైన ఆ ట్రైలర్ 5.66 లక్షల లైక్స్ తెచ్చుకుంది. ఆ ట్రైలర్ వచ్చి 5 నెలలవుతోంది. ఐతే ‘వివేగం’ టీజర్ మూడు నెలల కిందట విడుదలైంది. అప్పుడే 5.28 లైక్స్ సంపాదించింది. ఈ టీజర్ త్వరలోనే ‘స్టార్ వార్స్’ ట్రైలర్ లైకుల్ని కూడా దాటేసినా ఆశ్చర్యం లేదు. తమిళ స్టార్ హీరోలు అజిత్.. విజయ్ మధ్య కొంత కాలంగా ఈ వ్యూస్.. లైక్స్ విషయంలో గట్టి పోటీ నెలకొంది. ఈ విషయాన్ని చాలా ప్రతిష్టాత్మకంగా తీసుకుని.. వ్యూస్.. లైక్స్ పెంచే ప్రయత్నంలో ఉంటున్నారు అభిమానులు. ‘వివేగం’ టీజర్ ఆకర్షణీయంగా కూడా ఉండటంతో దీనికి వ్యూస్.. లైక్స్ మోత మోగింది. ఈ చిత్రం ఈ నెల 24న విడుదలకు సిద్ధమవుతోంది.