క్రాక్ వచ్చింది.. నాకు మెంటల్ ఎక్కిపోయింది: అఖిల్

'మోస్ట్ ఎలిజిబుల్ బ్యాచిలర్' సినిమాతో సక్సెస్ ట్రాక్ ఎక్కిన యూత్ కింగ్ అక్కినేని అఖిల్.. అదే జోష్ ని కంటిన్యూ చేయడానికి ఇప్పుడు ''ఏజెంట్'' చిత్రంతో రాబోతున్నాడు. ఇది అఖిల్ ఫస్ట్ పాన్ ఇండియా మూవీ. తెలుగు తమిళ మలయాళ కన్నడ హిందీ భాషల్లో విడుదల కానుంది.

దర్శక రచయిత వక్కంతం వంశీ అందించిన కథతో స్టైలిష్ డైరెక్టర్ సురేందర్ రెడ్డి 'ఏజెంట్' సినిమాను తెరకెక్కిస్తున్నారు. అనిల్ సుంకర నిర్మిస్తున్న ఈ చిత్రంలో సాక్షి వైద్య హీరోయిన్ గా నటిస్తోంది. ఇదొక స్పై యాక్షన్ థ్రిల్లర్. ఇందులో అఖిల్ ఒక సీక్రెట్ ఏజెంట్ పాత్రలో కనిపించనున్నాడు.

ఇప్పటికే రిలీజ్ చేయబడిన ఫస్ట్ లుక్ విపరీతంగా ఆకట్టుకోగా.. మేకర్స్ శుక్రవారం సాయంత్రం టీజర్ ను లాంచ్ చేశారు. 'ది మోస్ట్ నోటోరియస్.. మోస్ట్ రూత్ లెస్ పేట్రియాట్..' అంటూ 'ఏజెంట్' లో అఖిల్ క్యారక్టర్ ఎలా ఉండబోతుందో శాంపిల్ గా చూపించారు.

వైల్డ్ రైడ్ అంటూ డ్యాన్స్ చేస్తూ గన్ ఫైరింగ్ చేయడాన్ని బట్టి.. ఇంతకముందెన్నడూ చూడని డిఫరెంట్ యాటిట్యూట్ లో కనిపించబోతున్నాడని అర్థమైంది. అంతేకాదు అతని పాత్ర ఇందులో చాలా అగ్రిసివ్ గా లౌడ్ గా కనిపించింది.

స్టైలిష్ యాక్షన్ సీక్వెన్స్ లతో అద్భుతమైన స్క్రీన్ ప్రెజెన్స్ మరియు హాలీవుడ్ రేంజ్ గ్రాండ్ విజువల్స్ తో కూడా ఈ టీజర్ ఆడియన్స్ ను అక్కినేని అభిమానులను విశేషంగా అలరిస్తోంది. అందుకే యూట్యూబ్ లో మిలియన్ల వ్యూస్ తో లక్షల కొలదీ లైక్స్ తో దూసుకుపోతోంది.

ఇకపోతే హైదరాబాద్‌ లోని మల్లికార్జున థియేటర్‌ లో అభిమానుల సమక్షంలో నిన్న టీజర్ లాంచ్ ఈవెంట్ ను నిర్వహించారు మేకర్స్. దీనికి కోర్ టీమ్ అంతా హాజరయ్యారు. ఈ సందర్భంగా అఖిల్ మాట్లాడుతూ.. 'ఏజెంట్' లో తన పాత్ర బిగ్గరగా ఉంటుందని.. మెంటలెక్కిపోతుందని అన్నారు.

''షూటింగ్ లో అరిచీ అరిచీగొంతు పోయింది. సినిమా మొత్తం అరుస్తూనే ఉన్నాను. ఇవాళ మాట్లాడటానికి రాలేదు.. మీ ఎనర్జీ తీసుకోడానికి వచ్చాను. మీ ఎనర్జీ మొత్తం ఇచ్చేయండి. క్రాక్ వచ్చేసింది నాకు.. మెంటల్ ఎక్కిపోయింది. వస్తున్నాం.. ఇంక ఎక్కువ మాట్లాడను'' అని అఖిల్ అన్నారు.

నిర్మాత అనిల్ సుంకర మాట్లాడుతూ.. ''ఏజెంట్ టీజర్ కోసం అభిమానులు ఎంతో ఎదురుచూస్తున్నారు. ప్రతీసారి లేట్ అవుతూ వచ్చింది. 'ఎప్పుడు వచ్చామనేది కాదు.. బుల్లెట్ దిగిందా లేదా' అనే ఫేమస్ డైలాగ్ ఉంది. ఇది కేవలం మా ఏజెంట్ చిన్న గన్ లో నుంచి వచ్చిన బుల్లెట్.. మెషీన్ గన్ ఉంది అక్కడ. మళ్లీ చెప్తున్నా.. ఎప్పుడు వస్తున్నాం అనేది కాదు.. ఎంత గట్టిగా కొడుతున్నాం అనేదే కావాల్సింది. టీజర్ లో చూసిన స్టైల్ కి వందింతలు సినిమాలో చూస్తారు'' అని చెప్పారు.

'ఏజెంట్' సినిమా బ్లాక్ బస్టర్ అవడం గ్యారంటీ అని సురేందర్ రెడ్డి భరోసా ఇచ్చారు. ఈ సందర్భంగా హీరోయిన్ సాక్షి వైద్య మాట్లాడుతూ.. తాను తెలుగు నేర్చుకుంటున్నానని.. తదుపరి ఈవెంట్‌ లలో మరింత మాట్లాడతానని చెప్పుకొచ్చింది. ఈ కార్యక్రమంలో సినిమాటోగ్రాఫర్ రసూల్ ఎల్లోర్ కూడా పాల్గొన్నారు.

ఇకపోతే ఈ సినిమాలో మలయాళ నటుడు మమ్ముట్టి కీలక పాత్ర పోషిస్తున్నారు. హిప్ హాప్ తమిజా సంగీతం సమకూర్చగా.. నవీన్ నూలి ఎడిటర్‌ గా వర్క్ చేస్తున్నారు. ఎకె ఎంటర్‌టైన్మెంట్ మరియు సరెండర్2సినిమా బ్యానర్లపై సుంకర రామబ్రహ్మం నిర్మిస్తున్న 'ఏజెంట్' షూటింగ్ చివరి దశలో ఉంది. కొత్త విడుదల తేదీని మేకర్స్ త్వరలో ప్రకటిస్తారు.