నాన్నతో పాటే అఖిలూ వచ్చేశాడు..

దాదాపు రెండు వారాలుగా అక్కినేని కాంపౌండ్లో సౌండ్ లేదు. అఖిల్ అక్కినేని పెళ్లి రద్దు వార్త బయటికి వచ్చినప్పటికీ అన్నపూర్ణ స్టూడియోలో ఒకరకమైన నిశ్శబ్ధ వాతావరణం నెలకొంది. ట్విట్టర్లో సైతం అక్కినేని హీరోల సందడి లేదు. అభిమానులు కూడా సైలెంటుగా ఉన్నారు. ఐతే నిన్ననే నాగార్జున ట్విట్టర్లోకి తిరిగొచ్చి ‘బ్యాక్ టు బిజినెస్’ అంటూ మెసేజ్ పెట్టి ‘రాజుగారి గది-2’లోని తన లుక్‌ను అభిమానులతో పంచుకోవడంతో కొంచెం ఉత్సాహం వచ్చింది. అంతలోనే నాన్నతో పాటు చిన్నబ్బాయి అఖిల్ కూడా ట్విట్టర్లోకి పునరాగమనం చేసేశాడు. చివరగా ‘ఓం నమో వేంకటేశాయ’ రిలీజైనపుడు ఆ సినిమా గురించి ట్వీట్ పెట్టిన అఖిల్.. అప్పట్నుంచి ట్విట్టర్‌ కు దూరంగా ఉన్నాడు.

ఐతే బెంగళూరులో జరిగిన ఓ స్వచ్ఛంద సంస్థకు సంబంధించిన కార్యక్రమంలో పాల్గొన్న అఖిల్.. దాని గురించి ట్వీట్ చేశాడు. ఆ ఈవెంట్ ఫొటోలు కూడా షేర్ చేశాడు. అతి వేగం ప్రమాదకరమని.. యువతలో అవగాహన పెంపొంచేందుకు బెంగళూరుకు చెందిన ఒక స్వచ్ఛంద సేవా సంస్థ నిర్వహించిన కార్యక్రమమిది. అక్కడి స్టార్ హీరో యశ్‌ తో పాటుగా అఖిల్ కూడా ఆ కార్యక్రమానికి ముఖ్య అతిథిగా హాజరయ్యాడు. వేలాది మంది యువత ఆ కార్యక్రమానికి వచ్చారు. అఖిల్ వారి మధ్య బైక్ రైడింగ్ చేస్తూ వారికి కొన్ని టిప్స్ చెప్పాడు. ఆ కార్యక్రమం అంతా ఉల్లాసంగా కనిపించాడు. శ్రియతో పెళ్లి రద్దు తర్వాత అఖిల్ కూడా కొంచెం డిస్టర్బ్డ్‌గానే ఉన్నట్లు సమాచారం. దాన్నుంచి బయటపడి ఇక సినిమాలపై ఫోకస్ పెట్టడానికి ముందు ఆటవిడుపుగా అఖిల్ బెంగళూరు వెళ్లివచ్చినట్లు తెలుస్తోంది. విక్రమ్ కుమార్ దర్శకత్వంలో అఖిల్ చేయబోయే కొత్త సినిమా ఏప్రిల్ 1న సెట్స్ మీదికి వెళ్లనుంది.

Like Us on Facebook : https://www.facebook.com/Tupakidotcom/