అఖిల్‌ అస్సలు ఆలస్యం చేయనంటున్నాడు!!

అక్కినేని ప్రిన్స్‌ అఖిల్‌ పై అభిమానులు ఎంతో నమ్మకం పెట్టుకున్నారు. మెగా - నందమూరి ఫ్యామిలీల తరహాలో అక్కినేని ఫ్యామిలీ హీరో కూడా రికార్డుల మీద రికార్డులు సృష్టిస్తూ తాము కాలర్‌ ఎగరేసుకునేలా చేస్తాడు అనుకున్నారు. కాని అక్కినేని ఫ్యాన్స్‌ కు అఖిల్‌ తీవ్ర నిరాశ మిగిల్చాడు. మొదటి చిత్రం ‘అఖిల్‌’ తో డిజాస్టార్‌ ను చవి చూసిన అఖిల్‌ అక్కినేని రెండవ సినిమా ‘హలో’తో కాస్త పర్వాలేదు అనిపించాడు. అయినా కూడా అభిమానుల అంచనాలను మాత్రం అందుకోవడంలో విఫలం అయ్యాడు. ప్రస్తుతం మూడవ సినిమాను వెంకీ అట్లూరి దర్శకత్వంలో చేస్తున్నాడు. ప్రస్తుతం చివరి దశ చిత్రీకరణ జరుపుకుంటున్న అఖిల్‌ మూడవ సినిమా త్వరలోనే విడుదలకు సిద్దం కాబోతుంది.

అఖిల్‌ సినిమా పరిశ్రమకు ఎంట్రీ ఇచ్చిన్నప్పటి నుండి ఇప్పటి వరకు కేవలం మూడు సినిమాలు మాత్రమే చేశాడు. అఖిల్‌ ఫ్లాప్‌ తర్వాత రెండవ సినిమాకు చాలా ఎక్కువ గ్యాప్‌ తీసుకున్న అఖిల్‌ ఆ చిత్రం కూడా ఫ్లాప్‌ అవ్వడంతో మూడవ సినిమాకు కూడా గ్యాప్‌ తీసుకున్నాడు. దాంతో అఖిల్‌ సినిమాల సంఖ్య చాలా తక్కువగా ఉంది. అయితే ఇకపై వరుసగా చిత్రాలను చేయాలని అఖిల్‌ నిర్ణయించుకున్నాడు. సక్సెస్‌ ఫ్లాప్‌ లతో సంబంధం లేకుండా బ్యాక్‌ టు బ్యాక్‌ సినిమాలు చేయాలని నిర్ణయించుకున్నాడు. అందుకు సంబంధించిన చర్చలు - సంప్రదింపులు అవుతూనే ఉన్నాయి. అఖిల్‌ మూడవ సినిమా సెట్స్‌పై ఉండగానే నాల్గవ సినిమాకు సంబంధించిన ఏర్పాట్లు జరుగుతున్నాయి.

అఖిల్‌ నాల్గవ సినిమాకు సత్య ప్రభాస్‌ పినిశెట్టి దర్శకత్వం వహించబోతున్నాడు. భారీ అంచనాల నడుమ ఈ చిత్రాన్ని నాగార్జున నిర్మించేందుకు రెడీ అయ్యాడు. ఇక అఖిల్‌ అయిదవ సినిమాకు కూడా కథ సిద్దం అయ్యిందని తెలుస్తోంది. అఖిల్‌ అయిదవ సినిమాను కొత్త దర్శకుడితో చేయబోతున్నాడు. నిర్మాత ఎవరు అనే విషయంలో కూడా త్వరలో క్లారిటీ రావాల్సి ఉంది. వచ్చే ఏడాది అఖిల్‌ రెండు చిత్రాలను విడుదల చేయాలని పట్టుదలతో ఉన్నాడు. చేసిన ఆలస్యంను ఇలా కవర్‌ చేసుకునేందుకు అఖిల్‌ ప్రయత్నిస్తున్నాడు. ఆలస్యం కాకుండా చూసుకుంటున్నాడు సరే, సక్సెస్‌ అయ్యేలా చూసుకుంటాడా లేదా అనేది చూడాలి.