ఏ హీరోకూ దక్కని గౌరవం.. అఖిల్ కు దక్కింది

హీరోగా సినిమాల్లోకి అడుగుపెట్టక ముందే పలు నేషనల్, ఇంటర్నేషనల్ బ్రాండ్లకు అంబాసిడర్ గా మారాడు అఖిల్. బోలెడన్ని ఎండార్స్ మెంట్స్ తో గత కొన్నేళ్లుగా బిజీగా వున్నాడు. వీటికి కొంత విరామం ఇచ్చి... అఖిల్ మూవీతో హీరోగా తెరంగేట్రం చేశాడు. మాస్ ఎంటర్ టైనర్ గా రూపొందిన ఈ సినిమా అక్కినేని అభిమానులను ఏమాత్రం ఆకట్టుకోలేకపోయింది. దాంతో ఇప్పుడు కొంత గ్యాప్ తీసుకుని ఆచి తూచి అడుగేయాలని చూస్తున్నాడు. త్వరలోనే హిందీలో బంపర్ హిట్ అయిన ‘ఏ జవానీ హై దివానీ’ సినిమాను రీమేక్ చేయాలనే ఆలోచనలో వున్నాడు. రణ్ బీర్ కపూర్, దీపికా పదుకొణె జంటగా నటించిన ఈ లవ్ ఎంటర్ టైనర్ మూవీని ఇప్పుడు తెలుగులోకి అఖిల్ రీమేక్ చేయబోతున్నాడనే ప్రచారం జరుగుతోంది.

ఇది ఇలా వుండగా... ఇప్పటి వరకు ఏ తెలుగు హీరోకూ దక్కని గౌరవం.. అఖిల్ కు దక్కింది. బాక్సాఫీసు ను కొల్లగొట్టే ఎంతో మంది హీరోలున్న తెలుగు ఇండస్ట్రీలో... వారెవ్వరికీ దక్కనిది ఈ అక్కినేని చిన్నొడికి దక్కింది. అదేమిటంటే... జి.క్యూ. అనే ఓ ఇంటర్నేషనల్ లైఫ్ స్టైల్ మేగజైన్.. అఖిల్ గురించి ఓ పది పేజీలను ప్రచురించనుంది. ఇందులో అఖిల్ ఇంటర్వ్యూతో పాటు... అతని ఫొటో షూట్ ఫొటోలు - పర్సనల్ విషయాలన్నీ గుచ్చిగుచ్చి ప్రచురించబోతున్నారు. అబుదాబిలో ప్రత్యేకంగా గుర్తించిన లొకేషన్స్ లో అఖిల్ ఫొటో షూట్ ను నేటి నుంచి సోమవారం వరకు షూట్ చేయనున్నారు. ఇప్పటికే దానికి సంబంధించిన క్రూ మొత్తం అబుదాబికి వెళ్లినట్టు సమాచారం. అసలే సీసీఎల్, బ్రాండింగ్ తో విపరీతమైన ప్రచారం పొందిన అఖిల్.. ఈ ఇంటర్నేషనల్ మేగజైన్ స్టోరీతో ఇంకెంత పాపులర్ అవుతాడో వేచి చూద్దాం.